ئەمڕۆ ئەنجوومەنی وەزیرانی هەرێم لەسەر چەند پرسێک
کۆدەبێتەوە، فەرمانگەی میدیا و زانیاریی حکومەتی هەرێم لە راگەیەندراوێکدا
بڵاویکردەوە، ئەنجومەنی وەزیران بەسەرپەرشتیی مەسرور بارزانی، سەرۆكی ئەنجومەنی وەزیران
و بە ئامادەبوونی قوباد تاڵەبانی، جێگری سەرۆكی ئەنجومەنی وەزیران، كۆدەبێتەوە و سێ
بڕگە لە كۆبوونەوەكەدا تاوتوێ دەكات.
لە راگەیەندراوەکەدا هاتووە، بڕگەی یەكەمی كۆبوونەوەكە
تایبەتە بە خستنەڕووی دواپێشهاتەكانی بابەتی مووچە و دارایی و پابەندییەكان لەنێوان
حكومەتی هەرێم و حكومەتی فیدراڵی و ئەنجامی دواكۆبوونەوەی وەفدی تەكنیكیی هەردوولا
لە 27 ی نیسانی 2024 لە بەغداد سەبارەت بە دەستپێشخەرییەكانی حكومەتی هەرێمی كوردستان
لە بواری داهاتە نانەوتییەكان و بەبانكیكردنی مووچەی هەرێم.
ئاماژە بەوەش دەکات، بڕگەی دووەمی كۆبوونەوەكە تاووتوێكردنی
بابەتی بەهەمیشەییكردنی فەرمانبەرانی گرێبەست لە دامەزراوەكانی هەرێمی كوردستان دەبێت.
بەپێی راگەیەندراوەەکە، بڕگەی سێیەم خستنەڕووی راپۆرتی
وەزیری كشتوكاڵ و سەرچاوەكانی ئاو دەبێت سەبارەت بە سەردانی وەفدی وەزارتەكەیان بۆ
بەغداد، تایبەت بە بابەتەكانی وەرگرتنەوەی گەنمی ئەمساڵی جوتیاران و بەگەڕخستنی پرۆژەكانی
بەنداو و ئاودێری لە هەرێم و سوودوەرگرتنی جوتیاران لە دەرفەتەكانی خزمەتگوزارییە كشتوكاڵییەكان
هاوشێوەی ناوچەكانی دیكەی عێراق.
Copyright © 2020 Kirkuk Tv All Rights Reserved Designed And Developed By AVESTA GROUP