عیراق.. دابین كردنی بیمه‌ی ته‌ندروستی به‌ند ده‌كرێت به‌ په‌سه‌ندكردنی بودجه‌وه‌

وه‌زیری ته‌ندروستی عێراق رایگه‌یاند، بڕیاره‌ جێبه‌جێكردنی یاسای بیمه‌ی ته‌ندروستی له‌ مانگی (ئاب)ی ئه‌مساڵدا ده‌ستپێبكات، به‌ڵام پشت به‌ به‌ڕه‌زامه‌ندی بودجه‌ ده‌به‌ستێت. 
هانی ئه‌لعه‌قابی، وه‌زیری ته‌ندروستی عێراق، رایگه‌یاند: ده‌سته‌ی كارگێڕی بیمه‌ی ته‌ندروستی له‌ هه‌موو پارێزگاكانی عێراق پێكهێنراوه‌ و كادره‌كانمان ناساندوه‌ و كاریان له‌سه‌ر خوله‌كانی ده‌ره‌وه‌ و ناوه‌وه‌ی وڵات كردوه‌ و ئه‌زمونیان هه‌یه‌ .
وه‌زیری ته‌ندروستی عێراق باسی له‌وه‌شكرد ده‌رچونی یاسای بودجه‌ ڕێگه‌خۆش ده‌كات بۆ جێبه‌جێكردنی بیمه‌ی ته‌ندروستی له‌ سێ پارێزگا، وه‌ك قۆناغی یه‌كه‌م و دواتر به‌شه‌كانی دیكه‌ی پارێزگاكان ده‌گرێته‌وه‌، ده‌ستنیشانكردنی ئه‌و پارێزگایانه‌ی كه‌ دیاریكراون به‌پێی ژێرخانی پارێزگاكه‌ و ژماره‌ی نه‌خۆشخانه‌ و ژماره‌ی دانیشتوانی ئه‌نجامدراوه‌.
به‌پێی یاسای بیمه‌ی ته‌ندروستی، به‌شی زۆری تێچوه‌كانی چاره‌سه‌ر له‌ نه‌خۆشخانه‌ حكومییه‌كان و ئه‌هلییه‌كان بۆ نه‌خۆش دابین ده‌كرێن، یاساكه‌ش به‌ سێ قۆناغ جێبه‌جێ ده‌كرێت.