عیراق بڕی 20 ملیار دۆلار قه‌رزی ده‌ره‌كی له‌سه‌ره‌و تا ساڵی 2028 ده‌یداته‌وه‌

مه‌زهه‌ر محه‌مه‌د ساڵح، راوێژكاری ئابوری سه‌رۆك وه‌زیرانی عیراق، واده‌ی دانه‌وه‌ی قه‌رزه‌ ده‌ره‌كییه‌كانی عیراق ئاشكراده‌كات.

باسی له‌وه‌شكرد، عیراق بڕێك قه‌رزی سندوقی دراوی نێوده‌وڵه‌تی له‌سه‌ره‌ كه‌ به‌ دووجار وه‌ریگرتوه‌ و له‌سه‌ر خۆی ده‌یداته‌وه‌، یه‌كێك له‌وانه‌ش ساڵی 2015 بۆ كۆمه‌كی بودجه‌ی ئه‌و ساڵه‌ له‌شه‌ڕی داعش بڕی یه‌ك ملیار دۆلاری وه‌رگرتوه‌، دواتر له‌نێوان ساڵانی 2016 و 2017 بڕی 3 ملیار دۆلاری دیكه‌ی قه‌رزی بۆ بوژانه‌وه‌ی كه‌رتی ئابوری وه‌رگرتوه‌ .

راوێژكاره‌ ئابورییه‌كه‌ی مسته‌فا كازمی، ئاشكراشیكرد، ئه‌و قه‌رزه‌ ده‌ره‌كییانه‌ی له‌ئه‌ستۆی عیراقدایه‌و ده‌بێت بیژمێرێته‌وه‌، بره‌كه‌ی 20 ملیار دۆلاره‌و به‌پێی كات و له‌سه‌رخۆ و به‌ قیستی دیاریكراو ده‌یداته‌وه‌ و تاوه‌كو ساڵی 2028 ده‌بێت ته‌واوی ئه‌و قه‌رزانه‌ی دابێته‌وه‌ .

رونشیكرده‌وه‌، ئه‌و قه‌رزانه‌ی بانكی نێوده‌وڵه‌تی دابینی ده‌كات، دانه‌وه‌ی به‌شێوه‌یه‌كی له‌سه‌رخۆیه‌و زۆرجار دوای 6 ساڵ ده‌ستده‌كرێت به‌دانه‌وه‌یان به‌شێوه‌یه‌ك ده‌توانێت تاوه‌كو 14 ساڵ و له‌سه‌رخۆ بدرێته‌وه‌ و سوویه‌كی زۆر كه‌میش دێته‌ سه‌ر قه‌رزه‌كه‌ .