یەختێک به‌ژماره‌يه‌ك کۆچبەره‌وه‌ لە دەریای ئیجە ژێر ئاو کەوت

یەختێک بە 80 کۆچبەرەوە لە دەریای ئیجە له‌ نزیک دورگەی کارپاتۆس (Karpathos)ى یۆنان ژێر ئاو کەوت. 
بە پێی زانیاریەکان تاوه‌كو ئێستا هێزی دەریاوانی یۆنان توانیویەتی 29 کۆچبەر ڕزگار بکات و گه‌ڕان به‌دواى 51 کۆچبەره‌كه‌ى ديكه‌ش به‌رده‌وامه‌. 

وتەبێژی وەزارەتی دەریاوانی یۆنان ڕاگەیاند: له‌ئێستادا 29 کۆچبەر ڕزگارکراون کە عێراقی و ئەفغانی و ئێرانین، به‌ڵام تاوه‌كو ئێستا تەرمی هيچ کەسێك نەدۆزراوەتەوە و گه‌ڕانه‌كانيان بەردەوامه‌.

کۆچبەرە ڕزگار کراوەکان دەڵێن: نزيكه‌ 80 کۆچبەر بوون له‌يه‌خته‌كه‌ و لە ئاوی نێودەوڵەتی یەختەکەیان ژێرئاو کەوتووه‌، كه‌ پێش دوو ڕۆژ لە تورکیاوە بەڕێ کەوتوون به‌ئامانجى گه‌يشتن به‌ وڵاتى ئیتاڵیا.