سه‌ره‌تای هه‌فته‌ی داهاتو ڤاكسینی كۆرۆنا ده‌گاته‌ عێراق و بێ‌ به‌رامبه‌ر دابه‌شده‌كرێت

سه‌ره‌تای هه‌فته‌ی داهاتوو بۆ یه‌كه‌مینجار، ڤاكسینی ڤایرۆسی كۆرۆنا ده‌گاته‌ عێراق.
له‌و باره‌یه‌وه‌، حه‌سه‌ن ته‌میمی وه‌زیری ته‌ندروستیی و ژینگه‌ی عێراق، به‌ رۆژنامه‌ی (سه‌باح) راگه‌یاندوه‌، رۆژی شه‌ممه‌ی داهاتوو ڤاكسینه‌كه‌ بۆ یه‌كه‌مجار ده‌گاته‌ عێراق.

وه‌زیری ته‌ندروستی و ژینگه‌، ئاماژه‌ی بۆئه‌وه‌شكردوه‌، ڤاكسینه‌كه‌ به‌دیاریی له‌لایه‌ن چینه‌وه‌ ده‌درێته‌ عێراق و رۆژی شه‌ممه‌ش، یه‌كه‌م قۆناغی ڤاكسینه‌كه‌ ده‌گاته‌ عێراق و به‌سه‌ر چینه‌ هه‌ره‌ له‌پێشینه‌كاندا دابه‌شده‌كرێت.

بڕیاره‌ له‌و ڤاكسینه‌ی چین به‌ دیاریی بۆ عێراقی ده‌نێرێت، نزیكه‌ی پێنج هه‌زار ژه‌م بدرێته‌ هه‌رێمی كوردستان.

حه‌سه‌ن ته‌میمی جه‌ختی له‌وه‌كرده‌وه‌، ڤاكسینه‌كه‌ به‌یه‌كسانیی و به‌بێ به‌رامبه‌ر ده‌ده‌نه‌ هاووڵاتیانی عێراق.