بڕینەوەی دارەكان لەلایەن تورکیاو هاوپەیمانەکانی دیمەنی عەفرینیان گۆڕیوە

رۆژنامەنوسێكی كورد لەڕێگەی وێنەی مانگە دەستكردەكانەوە تیشك دەخاتە سەر بڕینەوەی بەردەوامی دارەكان لە ناوچەی عەفرینی ڕۆژئاوای كوردستان کە لەلایەن تورکیاوە داگیرکراوە، وێنەكان بە ڕونی قەبارەی بڕینەوەی دارەكان و ئەو گۆڕانگارییە گەورەیەی كە ڕویداوە نیشان دەدەن .
جەمال بالی ڕۆژنامەنوس و فۆتۆگرافەرێكی كوردە لە ڕۆئاوای كوردستان وێنەكانی لە پەڕەی تایبەتی خۆی لە پلاتفۆڕمی "X" بڵاوكردوەتەوە و دەڵێت، "بینەربن کە چۆن دارستانە چڕەکانی عەفرین بونەتە ناوچەیەكی گەورەی بێ بەرهەم، دوای ئەوەی تورکیا و بەکرێگیراوەکانی لە ساڵی 2018دا عەفرینیان داگیرکرد".
ئاماژەی بەوەشكردووە، "توركیا و بەكرێگیراوەكانی لە ماوەی شەش ساڵدا زۆربەی دارستانەکانی عەفرین و هەزاران دار زەیتونیان بڕیوەتەوە".

بەگوێرەی ڕاپۆرتێكی ڕێكخراوی PAXی هۆڵندی تەنها لەماوەی سێ ساڵی سەرەتای داگیركردنی عەفرین و تا ساڵی 2021، زیاتر لە 58%ی دارستانەکانی ئەو بەشەی ڕۆژئاوای كوردستان بڕدراونەتەوە و لەناوبراون.
لە كانونی دوەمی 2018 سوپای توركیا هێرشی كردە سەر ناوچەی عەفرین لە ڕۆژئاڤای كوردستان و داگیری کرد، لەوكاتەوە چەندین ڕاپۆرت لەبارەی تاوانە ژینگەیەكانی ئەو وڵاتە و هاوپەیمانەكانی بڵاوكراونەتەوە.