سێ رۆژنامەنووس لە باشووری رۆژهەڵاتی لوبنان کوژران

لە هێرشێکی ئاسمانی شەوی رابردووی ئیسرائیلدا بۆسەر باشووری رۆژهەڵاتی لوبنان لە نزیک سنوورەکانی سوریا، سێ رۆژنامەنووس کوژراون.
ئاژانسی هەواڵی نیشتمانیی لوبنان بڵاویکردەوە، "لە هێرشێکی درەنگانی شەوی رابردووی ئیسرائیلدا بۆسەر ناوچەی حاسبییە کە شوێنی نیشتەجێبوونە لە باشووری رۆژهەڵاتی لوبنان، سێ رۆژنامەنووس کوژراون".
ئاژانسی هەواڵی لوبنانی راشیگەیاندووە، هێرشەکە بۆ سەر ناوچەی 'شوەیفات العمروسییە' بووە، بووەتە هۆی وێرانبوونی دوو باڵەخانە و هەڵگیرسانی ئاگرێکی گەورە.
ئاژانسەکە ئاماژەی بەوەشکردووە، "فڕۆکە جەنگییەکانی ئیسرائیل لەنیوەشەودا هێرشەکەیان بۆسەر سنووری لوبنان و سووریا ئەنجامداوە".
لەبارەی هێرشەکانی ئیسرائیلەوە، لۆید ئۆستن، وەزیری بەرگری ئەمریکا چەندین جار نیگەرانی قوڵی خۆی لەبارەی هێرش بۆسەر هێزەکانی ئاشتیپارێزی نەتەوەیەکگرتووەکان لە لوبنان دەربڕیوە.
دوایین ئاگادارکردنەوەی ئۆستن رۆژی چوارشەممە بوو، ئەوەش دوای چەند سەعاتێک لە هێرشی ئیسرائیل کە بووە هۆی کوژرانی سێ سەربازی هێزە چەکدارەکانی لوبنان.