وەزارەتی پلاندانانی هەرێم: سبەینێ بژمێرەکانی سەرژمێری سەردانی ماڵەکان دەکەن

وەزارەتی پلاندانانی هەرێم رایگەیاند، سبەی بژمێرەکانی سەرژمێری سەردانی ماڵەکان دەکەن و چەند پرسیارێکیان لێ دەکەن.
وەزارەتی پلاندانانی هەرێم راگەیەندراوێکی بڵاوکردەوە و تێیدا هاتووە، لە یەکەم قۆناغی سەرژمێریدا بژمێره‌كانی سه‌رژمێری، له‌ ڕۆژانی ١٧، و ١٨ و ١٩ـی مانگ سه‌ردانی هەموو شوێنه‌كان ده‌كه‌ن، له‌ شار وله‌ گوندەکانی هه‌ر چوار پارێزگاکەی هه‌رێم، و هه‌موو خێزانه‌كان تۆمار ده‌كه‌ن .
بەپێی راگەیەندراوەکە سبەی دەبێت هاوڵاتیان وەڵامی ئەم پرسیارانە بدەنەوە، و بە مه‌به‌ستی ئاسانكاری بۆ خێزانه‌كان و بۆ بژمێره‌كانیش له‌ كاتی پڕكردنه‌وه‌ی فۆرمی سه‌رژمێری چه‌ند زانیارییه‌كی سه‌ره‌تاییان لێ وه‌رده‌گیرێت، وه‌ك جۆری باڵەخانە، ژماره‌ی خیزانه‌كانی نێو باڵەخانەکە، و ناوی سیانیی ئه‌ندامانی خێزان، و ناوی دایك و باوكی ئه‌ندامانی خێزان، په‌یوه‌ندیی كه‌سه‌كان به‌ سه‌رۆكی خێزان، و ڕه‌گه‌ز، مێژووی له‌دایكبوونیان وەردەگیرێت .