جێگری سەرۆکی هەرێم: پرسە و سەرەخۆشی خۆم ئاراستەی خانەوادە و کەسوکاری شەهیدەکان دەکەم

پەیامێک لە جێگری سەرۆکی هەرێمی کوردستانەوە
بە داخ و پەژارەیەکی زۆرەوە بەیانی ئەمڕۆ یەکشەممە ٢٠٢٤/١١/١٧ لە سنووری خورماتوو، بۆمبێکی چێندراو بە هێزێکی لیوای هاوبەشی پێشمەرگەدا تەقییەوە، لە ئەنجامی تەقینەوەکەدا عەقید سامان صابر سلێمان، فەرماندەی فەوجی ٣ی لیوای یەکی هاوبەشی پێشمەرگە و سوپای عێراق، عەقید محەمەد رەزا کەریم، ئەفسەری ئەندازەی فیرقەی ٩ی سوپای عێراق و ن.ض شەریف ئەحمەد محەمەد شەهید بوون و سێ پێشمەرگەش بریندار بوون.
بەم بۆنە خەمناکەوە پرسە و سەرەخۆشی خۆم ئاراستەی خانەوادە و کەسوکاری شەهیدەکان دەکەم، داواکارم لە یەزدان بە میهرەبانی و بەزەیی خۆی گیانیان بە بەهەشتی بەرین شاد بکات و ئارامی و دڵنەوایش بە خانەوادە و ئازیزان و کەسوکاریان ببەخشێ، هیوای زوو چاکبوونەوەش بۆ بریندارەکان دەخوازم.
شێخ جەعفەر شێخ مستەفا
جێگری سەرۆکی هەرێمی کوردستان