عەوادی: هەموو رێوشوێنێك بۆ سنورداركردنی گروپە چەكدارەكان دەگرینەبەر

وتەبێژی حكومەتی عیراق دەڵێت، هەموو رێوشوێنێك بۆ سنورداركردنی گروپە چەكدارەكان دەگرنەبەر و هەر هێرشێكیش لەلایەن ئیسرائیلەوە بكرێتەسەریان بەتوندی وەڵامی دەدەنەوە.
باسم عەوادی وتەبێژی حكومەتی عیراق رایگەیاند، لەدوای پەرەسەندنی گرژی و ئاڵۆزییەكانی ناوچەكە، وڵاتەكەیان لەلایەن ئیسرائیلەوە ڕووبەڕووی هەڕەشەی ئەمنی جددی بووەتەوە.
وتیشی ئەو هەڕەشانەی ئیسرائیل لە كاتێكی هەستیاردا دێن، لەكاتێكدا حكومەتی عیراق هەوڵێكی زۆر دەدات بۆ كۆنترۆڵكردنی ئەو گروپە چەكدارانەی هەوڵدەدەن خاكی عیراق بۆ هێرشكردنە سەر ئیسرائیل بەكاربهێنن.
باسم عەوادی جەختیكردەوە، حكومەتی عێراق ئامادەیە هەموو ڕێوشوێنێكی پێویست بۆ سنوورداركردنی دەسەڵاتی گروپە چەكدارەكان بگرێتەبەر.
دەشڵێت عیراق پاساو بۆ هێرشكردنە سەر خاكەكەی لە هیچ بارودۆخێكدا قبوڵ ناكات و وڵاتەكەیان بە توندی وەڵامی هەر هێرشێكی لەو جۆرە دەداتەوە.
لەچەند رۆژی رابردوودا ئیسرائیل یاداشتێكی ئاڕاستەی ئەنجومەنی ئاسایشی نەتەوەیەكگرتووەكان كرد و داوای لێكرد فشاری بخاتە سەر بۆ راگرتنی هێرشی گروپە چەكدارەكان بۆ سەر ئیسرائیل، عیراقیش یاداشتەكەی بە بیانوو بۆ هێرشكردنە سەر عیراق لەلایەن ئیسرائیلەوە ناوبرد.