وەزارەتی ناوخۆی عیراق: تەنیا 18 ئەفسەر و کارمەندمان بە تۆمەتی گەندەڵی دەستگیرکردووە

وەزارەتی ناوخۆی عێراق لە راگەیاندراوێکدا بڵاویکردەوە، ئەو هەواڵانەی دەڵێن  لە بازگەكانی كەركوك ژمارەیەك ئەفسەر و كارمەند دەستگیر كرون، راست نین.
لە راگەیاندراوەی وەزارەتی ناوخۆدا، هاتووە لە تۆرە کۆمەڵایەتییەکان دەنگۆی دەستگیركردنی 320 ئەفسەر و کارمەندی بازگەکانی کەرکوک بڵاوبووەتەوە، گوایە پەیوەندی بە بابەتی  پرۆسەی سەرژمێرییەوە هەیە، بەڵام ئەم بابەتە راست نییە، بەڵکو ئێمە 18 ئەفسەر و کارمەندمان بە تۆمەتی گەندەڵی دەستگیر کردووە.
باسیان لەوەش کردووە، هەموو ئەفسەر و کارمەندەکانی ئێستای بازگەکان بەبێ کێشە کار دەکەن و ئەرکی خۆیان بە ئەمەکەوە بەجێ دەگەیەنن.
دوێنێ بەرەی توركمانی لە كەركوك كۆنگرەیەكی رۆژنامەوانییدا رایانگەیاند 320 ئەفسەر و كارمەندی بازگەكانی چیمەن، دارەمان و پردێ دەستگیر كراون، داواشیان لە وەزیری ناوخۆی عێراق كرد، لێكۆڵینەوە لەگەڵ بەڕێوەبەری پۆلیسی كەركوك بكات و ئەم بابەتە روونبكاتەوە.