قەدەغەی هاتوچۆی نێوان پارێزگاکان درێژکرایەوە

بەهۆی تەواونەبوونی سەرژمێری و تۆمارنەكردنی بەشێكی هاووڵاتییان، بەبڕیاری دەستەی باڵای سەرژمێری قەدەغەی هاتووچۆ لەنێوان شار و قەزا و ناحییەكان بۆ ئەمڕۆش درێژكرایەوە، هاوكات لە هەرێمی كوردستانیش دەستپێكردنی قۆناغی سێیەمی سەرژمێری 5 ڕۆژ دوادەكەوێت بەهۆی خوولی ڕاهێنانی كارمەندانەوە.
عەمید میقداد میری، وتەبێژی لیژنەی باڵای ئەمنی سەرژمێریی گشتی لە عێراق رایگەیاند، قەدەغەی هاتووچۆ لەناو پارێزگاکان سەعات 12ی ئەمشەو کۆتایی هات، بەڵام قەدەغەی هاتووچۆ لە نێوان پارێزگاکان تا رۆژی هەینی بەردەوام دەبێت.
سەبارەت بە قۆناغی داهاتووی پرۆسەکەش عەبدولزەهرە هنداوی، وتەبێژی وەزارەتی پلاندانانی عێراق وتی، قۆناغی سێیەمی پرۆسەکە لە ئەمڕۆوە لە پارێزگاکانی عێراق دەستپێدەکات.
بەپێی داتاکانی حکومەتی عیراق بەشداری هاووڵاتییان لە پڕۆسەی سەرژمێری گەیشتە ٩٧%، لەكەركوك بەرزترین رێژە و لەبەغدادیش كەمترین تۆماركرا، لەسەر ئاستی هەرێمیش بەرزترین رێژە لە هەولێرە تۆماركراوە.