ئەنجومەنی وەزیرانی حکومەتی هەرێمی کوردستان بۆ چەند پرسێکی گرنگ کۆدەبێتەوە، کە گرنگترینیان پرسی مووچە و هاوتاكردنی ناونیشانە وەزیفییەكانە لە هەرێمی كوردستان لەگەڵ حكومەتی فیدراڵدا.
ئەمڕۆ چوارشەممە، 11ی 12ی 2024، ئەنجومەنی وەزیرانی هەرێمی كوردستان ، بە ئامادەبوونی مەسرور بارزانی سەرۆكی حكومەتی هەرێمی كوردستان و قوباد تاڵەبانی جێگری سەرۆكی حكومەتی هەرێمی كوردستان بۆ تاووتوێکردنی دوو بڕگە كۆدەبێتەوە.
لەبڕگەی یەکەمی کۆبوونەوەکەدا بڕیارە رووداو و پێشهاتەكانی ئەمدواییەی وڵاتی سووریا گفتوگۆی لەبارەوە بکرێت.
هاوکات لەبڕگەی دووەمدا دواپێشهاتەكانی پەیوەندیدار بە بابەتی مووچە و هەمواركردنەوەی یاسای بودجەی گشتیی فیدراڵ و خشتەكانی هاوپێچی یاساكە بۆ ساڵی دارایی 2025 گفتوگۆ دەكرێت و پێشنیاری هاوبەشی وەزارەتی دارایی و ئابووری و ئەنجومەنی گشتیی ڕاژە بۆ هاوتاكردنی ناونیشانە وەزیفییەكان لە هەرێمی كوردستان لەگەڵ حكومەتی فیدراڵی لەبەر ڕۆشنایی یاسای ژمارە (9)ی ساڵی 2024 دەخرێتە ڕوو.
Copyright © 2020 Kirkuk Tv All Rights Reserved Designed And Developed By AVESTA GROUP