ئەحمەد شەرع: سووریا نابێتە هەڕەشە بۆسەر وڵاتانى دراوسێ و رۆژئاوا

ئەحمەد شەرع، فەرماندەى پرۆسە سەربازییەکانى سووریا رایگەیاند، وڵاتەکەى بەدەست شەڕەوە ماندوو بووەو نابێتە هەڕەشە بۆ سەر وڵاتانى دراوسێ و  رۆژئاوا.
شەرع، لە دیمانەیەکدا داواى هەڵگرتنى سزاکانى سەر سووریاى کردو داواشیکرد دەستەى تەحریرى شام لە لیستى رێکخراوە تیرۆریستییەکان بسڕدرێتەوە، کە لە لیستى تیرۆرى نەتەوەیەکگرتووەکان و ئەمریکاو یەکێتیى ئەوروپاو بەریتانیادایە.
وتیشی "دەستەى تەحریرى شام گرووپێکى تیرۆریستى نییە". ئاماژەى بەوەکرد، ئەوان خەڵکى سڤیل و شوێنە مەدەنییەکان بە ئامانج ناگرن و گرووپەکەى بە قوربانى، تاوانەکانى دەسەڵاتى ئەسەد ناوبرد.
رەتیشیکردووەتەوە سووریا ببێتە کۆپییەکى ئەفغانستان، ئاماژەى بەوەشکردووە هەردوو وڵات جیاوازن، دابونەریتى جیاوازیان هەیە و بۆچوونى وایە ئەفغانستان کۆمەڵگەیەکى خێڵەکى هەیە، دەشڵێت سووریا عەقڵیەتێکى جیاوازى هەیە و کە بڕواى بە خوێندنى ژن هەیە.