مسته‌فا كازمی داوا لە تاوانباره‌ بێ‌ تاوانه‌كه‌ی بابل ده‌كات سكاڵا تۆمار بكات

مستەفا کازمی، سەرۆک وەزیرانی عێراق پێشوازیكرد لە عەلی جبوری کە له‌لایه‌ن هێزه‌ ئه‌منییه‌كانی بابله‌وه‌، بەتۆمەتی کوشتنی هاوسەرەکەی دەستگیرکراو دانی بەکوشتن و سوتاندنی تەرمەکەدا نا، بەڵام دواتر دەرکەوت دانپێدانانەکەی لەژێر "ئەشکەنجەدا" لێوەرگیراوە و هاوسەرەکەی لەژیان دایە.

نوسینگەی سەرۆک وەزیرانی عێراق بڵاویکردەوە، مستەفا کازمی پێشوازیكردوه‌ لە عەلی جبوری کە بە "ناڕەوا" بەکوشتنی هاوسەرەکەی تۆمەتبارکرابو، لەکاتێکدا، هاوسەرەکەی لەژیاندایە، لەکۆبونەوەکەدا لێکۆڵەرانی دۆسیەکەش ئامادەبون و رونکردنەوەیان پێشكه‌ش به‌ كازمی كرد لەبارەی روداوەکەوه‌.
 
ئەوەش هاتوە، سەرۆک وەزیران بڕیاری دا لێکۆڵەرانی دۆسیەکە لەکارەکانیان سڕ بکرێن و لێکۆڵینەوەیان لەگەڵدا بکرێت، هەروها لەکارکردن رابەگیرێن تا دەسەڵاتی دادوەری بڕیار لەبارەیانەوە دەدات.

 
نوسینگەی سەرۆک وەزیرانی عێراقش ئەوەشی خستەڕو، کازمی داوای لە عەلی جبوری کردوە سکاڵا تۆمار بکات و داوای گەڕاندنەوەی مافەکانی بکات، بۆ ئەو مەبەستەش لیژنەیەک بۆ چاودێری گەڕاندنەوەی مافەکانی پێکدەهێنرێت.

 
لەماوەی چەند رۆژی رابردودا بەڕێوەبەرایەتی پۆلیسی بابل دانپێدانانی پیاوێکی بڵاوکردەوە کە باسی لەوەکردوە، خێزانەکەی کوشتوە و جەستەی سوتاندوە، بەڵام دواتر دەردەکەوێت خێزانەکەی لەژیاندایە ئەوەش کاردانەوەی شەقامی عێراقی لێکەوتوەتەوە و چالاکوانان دەڵێن، ئەو کەسە لەژێر ئەشکەنجەدا دانپێدانانی لێوەرگیراوە.