کۆمیسیۆن نموونەی سەرەتایی فۆڕمی دەنگدانی بۆ ھەڵبژاردنی پەرلەمانی کوردستان پەسەندکرد

کۆمیسیۆنی باڵای سەربەخۆی ھەڵبژاردنەکانی عێراق، نموونەی سەرەتایی فۆڕمی دەنگدانی بۆ ھەڵبژاردنی پەرلەمانی کوردستان پەسەندکرد.
کۆمیسیۆنی باڵای سەربەخۆی ھەڵبژاردنەکانی عێراق بڵاویکردەوە، لە دوایین کۆبوونەوەی ئەنجومەنی کۆمیسیاراندا نموونەی سەرەتایی فۆڕمی دەنگدان بۆ ھەڵبژاردنی پەرلەمانی کوردستان پەسەندکراوە و ھەر بازنەیەکی ھەڵبژاردنیش، فۆڕمی دەنگدانی تایبەت بەخۆی دەبێت.
ئەوەشی خستووەتەڕوو، ھاوکات نمونەی سەرەتایی فۆڕمی دەنگدان بۆ ڕۆژی دەنگدانی تایبەتیش پەسەندکراوە.
بەگوێرەی ئامارەکانی کۆمیسیۆن بۆ ھەڵبژاردنی پەرلەمانی کوردستان، دوو ملیۆن و ٨٨٨ ھەزار و ١٦٢ کەس مافی دەنگدانیان ھەیە لەهەرێمی کوردستان، بۆ ئەو مەبەستەش حەوت ھەزار و ٤٧ بنکەی دەنگدان و ھەزار و ٤٢٧ ناوەندی دەنگدان لە پارێزگاکانی ھەرێم دادەندرێن .