قوباد تاڵەبانی، جێگری سەرۆک وەزیران پێشوازیکرد لە یاکۆ بیرێندس، کونسوڵی گشتیی هۆڵەندا لە هەرێمی کوردستان و لە کۆبوونەوەی نێوانیاندا چەند پرسێکی جێی بایەخی هەردوولا تاوتوێکران.
لە کۆبوونەوەکەدا کە رۆژی چوارشەممە (7ی ئابی 2024) لە هەولێر بەڕێوەچوو، بەبۆنەی کۆتایی هاتنی ئەرکەکەی، قوباد تاڵەبانی هیوای سەرکەوتنی بۆ کونسوڵی گشتیی هۆڵەندا لە ئەرکی داهاتوویدا خواست.
جێگری سەرۆک وەزیران بە ئاماژەدان بە هاوکارییەکانی هۆڵەندا لە ماوەکانی رابردوودا بۆ چاکسازی لە وەزارەتی پێشمەرگە و ریفۆرمی ئابوری و چەند بوارێکی دیکە، هیوای خواست ئەم هاوکارییانە لە داهاتووشدا بەردەوامییان هەبێت و پەیوەندییەکانی نێوان هەردوولا بەرەوپێشچوونی زیاتریش بەخۆیەوە ببینێت.
لە بەشێکی دیکەی کۆبوونەوەکەدا گفتوگۆکرا لەبارەی پێویستیی پەرەپێدان بە تواناکانی گەنجانی کارساز و داهێنەر. هەردوولا هاوڕابوون پەرەپێدانی تواناکانی گەنجانی کارساز و داهێنەر یارمەتیدەر دەبێت لە گەشەسەندنی ئابوری و کەرتی تایبەت لە هەرێمی کوردستان. لەم چوارچێوەیەدا قوباد تاڵەبانی هیوای خواست هۆڵەندا لە بواری پەرەپێدانی تواناکانی گەنجاندا هاوکاری هەرێمی کوردستان بکات.
Copyright © 2020 Kirkuk Tv All Rights Reserved Designed And Developed By AVESTA GROUP