پارتی له شاری هه‌ولێر هه‌ر له به‌ره‌به‌یانی ئه‌مڕۆوه هێزێكی زۆری له‌سه‌رجه‌م شه‌قام و شوێنه گشتییه‌كاندا بڵاوه‌پێكردووه‌و له بازگه‌كانش رێگریی له هاتوچۆی هاووڵاتییان ده‌كات.
به‌پێی زانیارییه‌كان له به‌ره‌به‌یانی ئه‌مڕۆوه كه هاوكاته له‌گه‌ڵ ساڵیادی 31 ئابی ساڵی 1996 كه سوپای عێراق به‌هاوكاری هێزه‌كانی پارتی، شاری هه‌ولێری داگیركرده‌وه‌و ده‌ستیانكرد به كۆمه‌ڵكوژكردن وتاڵانكردنی شاره‌كه، پارتی هێزێكی زۆری چه‌كداری له سه‌رجه‌م شه‌قام و شوێنه گشتیه‌كانی هه‌ولێر بڵاوه‌یپێكردووه.
له‌لایه‌كی دیكه‌شه‌وه هێزه‌كانی ئاسایشی سه‌ربه پارتی، ئەمڕۆ ڕێگریی ده‌كه‌ن لە هاتن و چوونی هاووڵاتییان بە تایبەت گوندنشینانی كاكەیی بۆ هاتنیان بۆ هەولێر و موسڵ بۆ بەشداریكردن لە یادكردنەوەی خیانەتی 31 ئاب.
به‌وته‌ی چه‌ند سه‌رچاوه‌یه‌ك، بەرپرسانی باڵای پارتی فه‌رمانیان به بازگەكانی نێوان هەولێر و موسڵ كردووه‌و ئاگاداریانكردوونه‌ته‌وه كە گومانیان لەهەر هاووڵاتییەك هەبوو بچێتە هەولێر بۆ بەشداریكردن لە یادی خیانەتی 31ی ئاب ڕێگریی لێبكەن.
ئەمڕۆش لە بازگەكانی نێوان هەولێرو موسڵ ئەو فەرمانە جێبەجێكراوەو ڕێگە لەهاتن و چوونی هاووڵاتییان گیراوە بۆ ئەوەی لەبەردەم مەڵبەندەكانی هەولێرو موسڵی یەكێتی نیشتمانی كوردستان بەشداری ئەو یادە بكەنەوە.
ئه‌و سه‌رچاوانه باسیان له‌وه‌شكرد كه، ئاسایشی پارتی بە تایبەت ڕێگرییان لە گوندنشینانی كاكەیی كردووە بۆ ئەوەی بڕۆنە هەولێر یان موسڵ، چونكە زۆرینەی گوندنشینانی كاكەیی لایەنگری یەكێتی نشتیمانی كوردستانن و ئاسایشی پارتی ڕێگەیان نەداوە ئەمڕۆ هیچ جۆرە هاتووچۆیەك بۆ دەرەوەی گوندەكانیان بكه‌ن.
Copyright © 2020 Kirkuk Tv All Rights Reserved Designed And Developed By AVESTA GROUP