کۆمسیۆن نموونەی فۆڕمی دەنگدانی بۆ هەڵبژاردنی پەرلەمانی کوردستان بڵاوکردەوە

کۆمیسیۆنی باڵای سەربەخۆی هەڵبژاردنەکانی عێراق، نموونەی فۆڕمی دەنگدانی بۆ هەڵبژاردنی خولی شەشەمی پەرلەمانی کوردستانی بڵاوکردەوە و لقی هەولێری کۆمسیۆنیش دەڵێت هەر کەس و لایەنێک سەرپێچی بکات سزا دەدرێت.
کۆمیسیۆن نموونەی پێنج فۆڕمی دەنگدان بڵاوکردووەتەوە، کە چوار فۆڕمیان تایبەتن بە هەر چوار بازنەکەی دەنگدان و نموونەی پێنجەم بۆ هەڵبژاردنی تایبەتە.

بەگوێرەی فۆڕمەکان بۆ دەنگدانی گشتی، پێویستە دەنگدەر لیسی دڵخوازی خۆی دیاریی بکات و دواتریش ژمارەی ئەو کاندیدە هەڵبژێرێت کە دەیەوێت لە پەرلەمانی کوردستاندا نوێنەرایەتی بکات.

بەڵام لە دەنگدانی تایبەتەدا، پێویستە دەنگدەر سەرەڕای هەڵبژاردنی لیست و کاندید، لە بەشی سەرەوەی لای چەپی لیستەکە، ئەو بازنەیە دیاریی بکات، کە تێیدا نیشتەجێیە و دەنگەکەی سەر بەو بازنەیەیە.

لقی هەولێری كۆمیسیۆنی باڵای سەربەخۆی هەڵبژاردنەكانی عێراقیش ئاشكرای دەکات، هەر کاندید و لیستێك سەرپێچی بانگەشەی هەڵبژاردن بكات، سزا دارایی دەدرێت.

راشیگەیاندووە لیژنەکانیان بەردەوام لە شەقامەکاندا چاودێریی بانگەشەی هەڵبژاردن دەکەن و هەر سەرپێچییەک  هەبێت لیست و کاندیدەکەی لێ ئاگاداردەکەنەوە لەماوەی سێ رۆژدا لای نەبات، سزاکەی دەبێتە دوو هێندە.