نەوت بەسەر ئاوارەکانی دهۆکدا دابەشدەکرێت

وەزارەتی کۆچ و کۆچبەرانی عێراق 200 لیتر نەوت بۆ  ئاوارەکانی کەمپەکانی دهۆک دەنێرێت و بە دوو قۆناخ پێیان دەدرێت
عەلی جەهانگیر، وتەبێژی وەزارەتی کۆچ و کۆچبەرانی عێراق رایگەیاند بەهۆی هاتنی وەرزی سەرماوە، دوێنێ فەرمانی ناردنی ئەو 200 لیتر نەوتە بۆ ئاوارەی کەمپەکانی دهۆک دەرکراوە.
وتیشی دەستیان بە رێوشوێنەکان لەگەڵ بەڕێوەبەرایەتی دابەشکردنی بەرهەمە نەوتییەکان بۆ دابینکردنی ئەو نەوتە کردووە و بە دوو جار هەر جارێک  100 لیتر نەوتیان پێ دەدرێت.
وتەبێژی وەزارەتەکە روونیشیکردەوە لە ماوەی مانگێکدا ئەو نەوتە دابین دەکرێت، تاوەکو دابەش نەکرێت نازانرێت چەند خێزان دەگرێتەوە.
نزیکەی 20 هەزار خێزانی ئاوارە لە کەمپەکانی هەرێمی کوردستانن، کە زۆرینەیان لە سنووری پارێزگای دهۆکن و لە کوردانی ئێزدیی شەنگال و خەڵکی ناوچەکانی دیکەی سنووری پارێزگای نەینەوا پێکهاتوون.