ئاماژە و پێشهاتێکی مەترسیدار

لێدوان و قسە و پەیامی بەرپرسە باڵاکانی پارتی دیموکراتی کوردستان  لە رۆژانی بانگەشەو پاشانيش لەدوای کۆتایی هاتنی هەڵبژاردنی پەلەمانی کوردستان ،کە دەیانگوت : (یەک حكومەتی سەرتاسەری ، یەک هەرێمی کوردستان ).لەلایەن جەماوەری کوردستان و هێزو لایەنە سیاسییەکان و بەتایبەتی لەلایەن یەکێتیی نیشتمانیی کوردستانەوە  وەکو هەڵوێست و هەنگاوێکی نوێ وئەرێنی  خوێندنەوەو لێکدانەوەی بۆدەکرا،کە ئەم هەنگاوە وەکو کرانەوەو دەست پێشخەرییەکی نوێ ببێتە فاکتەری کۆتایی هێنان بە فکری دوو ئیدارەیی و جیاوازی نێوان شارو شارۆچکەکانی هەرێمی کوردستان ،کۆتایی هێنان بەوجیاکاریەی کەلە نێوان هاوڵاتیان دەکرا لەسەر ئینتیمای سیاسی و حزبی، بەڵام لەدوای ئەو هەڵوێستە نوێیەی پارتی،  لە هەولێری پایتەخت هەندێ بریاری رەسمی دەرکران کە نارێک و پێچەوانەی ئەو پەیام و هەڵوێستە نوێیەی پارتی بوون، کۆمەڵێک پرسیارو  تەفسیرو گومان و نیگەرانی بەدوای خۆیدا هێناوە.
- بۆنمونە ،لەهەولێری پایتەخت کاتێ  دەرگای  بارەگای نوێنەرایەتی هەدەپە بەرەسمی داخرا، تیمەکەیان  رەوانەی شاری  سلێمانی کرا ! لێرەدا قسە لەسەر هۆکاری داخستنی   بارەگاکە ناکەین ،بەڵکو  دەخوازین قسە لەسەر ئەوە بکەین کە بۆچی تیمی هەدەپە رەوانەی سلێمانی بکرێت ؟!. لای هەموان مەعلومە لەسەر ئاستی جیهان و لە بواری دیپلۆماسیدا  ، کاتێک حكومەتی وڵاتێک تیمێکی دیپلۆماتکارانی  وڵاتێکی دیکە لەبەر هەر هۆکارێک بێت  دوردەخاتەوە، رەوانەی وڵاتەکەی خۆی دەکاتەوە ،نەک لەشارێکەوە بۆ شارێکی دیکەی هەمان وڵات دوربخاتەوە.

- دووەم: وەک هەندێ لە رۆشنبیرو میدیاکاران و چاودێرانی سیاسی دەڵێن ئەگەر مانەوەی تیمی هەدەپە لەهەولێر مەترسی بێت بۆسەر هەرێم ، ڕەوانەکردنیشیان بۆسلێمانی هەر مەترسی بۆسەر هەرێم دروست دەکات  ، ئەگەر مانەوەیان لەهەولێر کارێکی نایاساییە ،ئەوا مانەوەیان لەسلێمانیش بەهەمان شێوە کارێکی نایاسایی دەبێت ، بەهەر پێودانگێک بێت ئەمەی ئیدارەی هەولێر کردوویەتی بۆ هەر مەبەستێک بێت ، دەکەوێتە خانەی تۆخکردنەوەی مەیلی دوو ئیدارەیی و رەنگرێژکردنەوەی توخبەکانی نێوان  هەردوو دەڤەری سەوزو زەرد .

- لەلایەکی دیکەوە، لەبریارێکی دیکەی ئیدارەی هەولێردا و بەنوسراوێکی نهێنی و تایبەت و بەئیمزای بەرێوەبەری گشتی پۆلیسی هەرێم  ، فەرمانی کارگێری دەرکراوە بۆ گواستنەوەی مفەوزێکی پۆلیسی ناوخۆ لەشاری زاخۆ  بۆ قەزای کۆیە بەبێ ئەوەی ئاگاداربێت ، بەبێ ئەوەی داوای گواستنەوەی کردبێت ، بەبێ ئەوەی هیچ کەمتەرخەمی و سەرپێچیێکی کردبێت ،تەنها لەبەر ئەوەی لەخێزانێکی یەکێتین !.  سەیرەکەش لەوەدایە کەنوسراوەکە بەنهێنی و تایبەت لەهەولێرەوە بۆکراوە !.ئەمەش ئەو گومانە  لەراستییەوە نزیک دەکاتەوە کە مەیلێکی نوێ هەبێت بۆ تۆخکردنەوەی روخساری دوو ئیدارەیی لەهەرێم .
- لەم سەروبەندەدا لەسەیتەرەی  سەر پردی قەندیل ی  زێی گەورە (زێی بادینان) رێگری  لە کادرێکی دیاری کۆمەڵایەتی یەکێتی کرا کە بچێتە ئاکرێ و پێیانی راگەیاندووە کە ئەمە ئەمرەو رێگات پێنادەین  بچیتە ئاکرێ و دەبێ بگەرێیتەوە سلێمانی . ئەم رووداوەش هاوشێوەی تیمی هەدەپەیە ،چونکە ئەگەر ئەو هەڤاڵە مەترسی بێت بۆسەر ئاکرێ ،ئەوا مەترسیش دەبێت بۆ سەر سلێمانی .
- هەندێ لە چاودێران پێیان وایە کە پارتی  بەم رووداوانە پەیامێک ئاراستەی لایەنە سیاسییەکانی کوردستان دەکات و پێیان دەڵێت ئەگەر پێشهاتەکانی دوای هەڵبژاردنەکان بەدڵی ئێمە نەبێت  ،مەیلی ئێمە بۆ توخکردنی روخساری دوو ئیدارەیی زیاتر دەبێت و ئامادەین سەرلەنوێ   توخبەکانی  نێوانمان  رەنگ رێژبکەین، ئەمەش   نەک هەر بۆ خەڵکی  هەرێمی کوردستان  دڵخۆشکەرنابێت  ،بەڵکو بە  ئاماژەیێکی مەترسیدار  و پێشهاتێکی نوێ دەبینرێت .

*لێپرسراوی بۆردی راگەیاندنی یەکێتیی نیشتمانیی کوردستان