سیاسەت و ستراتیژیەتی یەكێتی لە بەغدا

سەرۆك بافڵ تاڵەبانی لە كۆنفرانسی دیالۆگی نێودەوڵەتی بەغدا، بەشێوەیەكی روون و راشكاو، سیاسەت و نەخشەرێگا و ستراتیژییەتی یەكێتیی نیشتمانیی كوردستانی لە چوارچێوەی دیبەیتێكدا خستەڕوو، ستراتیژیەتی سەرۆك خۆی لە چەند پرس و پەیامێكی نەتەوەیی، نیشتمانی، سیاسی، ئەمنی، ئیداری و یاسایی، پەیوەندییەكان و دیپلۆماسی دا دەبینیەوە و لەسەر كۆی ئەو پرسانە وەڵامەكانی سەرۆكی یەكێتی جۆرێك لە گەشبینی پێوە دیاربوو، هۆكاری ئەوەش بۆ ئەوە دەگەڕێتەوە كە تاكە بژاردەی چارەسەركردنی كێشەكان، هەڵبژاردنی رێچكەی ئاشتی و یەكتر قبوڵكردن و دانوستانێكی جددییە بە مەبەستی گەیشتن بە رێككەوتن. 
ئەوەی زیاتر جێگای هەڵوەستە لەسەركردن بوو، ئەو پەیامە نیشتمانی و نەتەوەییە بوو كە ئاڕاستەی هێز و لایەنە سیاسییەكانی باشوری كوردستان و رۆژئاوای كوردستانی كرد، لەسەر باشوری كوردستان تیشكی خستە سەر گرنگی هەڵبژاردنی داهاتووی عێراق و داوایكرد كورد لە بەغدا لە چوارچێوەی یەك هاوپەیمانێتیدا خەبات بكات بۆ پاراستن و بەدیهێنانی مافە رەواكانی گەلی كوردستان و پەیوەندییەكانی خۆمان لەگەڵ حكومەتی داهاتووی بەغدا لەسەر بنەمای شەراكەتی راستەقینە و چارەسەركردنی كێشەكانی نێوان هەردوولا بە پشت بەستن بە دەستوری عێراق پتەوتر بكەین. 
سەرۆك بافڵ تاڵەبانی ئەم جارە لە بەغداوە و هاوشێوەی كۆنفرانسی میونشن رۆژئاڤای كوردستانی لەبیر نەكرد و جارێكی دیكە سیاسەت و هەڵوێستی یەكێتی سەبارەت بە پرسی رۆژئاڤا بەشێوەیەكی شەفافانە خستە ڕوو، لەگەڵ ئەوەی داوایكرد كوردانی رۆژئاڤا بەرەیەكی هاوبەش پێك بێنن و بە یەكگرتوویی روو بكەنە دیمەشق و بەرگری لە مافە رەواكانی گەلی كورد لەو بەشەی كوردستان بكەن، داواشی لە وڵاتانی خۆرئاوا كرد خوێندنەوەیەكی واقیعی بۆ دۆخی ئێستای سوریا و ئەو مەترسی و هەڕەشانەی كە لەسەر ئایندە و چارەنووسی پێكهاتەكانی ئەو وڵاتە دروست دەبن، ئەگەر بەبێ بەشداری پێكهاتەكان و بەبێ رەچاوكردنی تایبەتمەندییان و مافەكانیان، ئەو پێكهاتانە لە دەستوری ئەو وڵاتە بنووسرێت. 
ئەوەی كە زیاتر دیدارەكەی دەوڵەمەند كرد خستنەڕووی هەڵوێستێكی هاوسەنگی یەكێتی بوو لەسەر ناكۆكی و دژبەرییەكانی نێوان ئەمریكا و كۆماری ئیسلامی ئێران و دیدگای خۆی خستەڕوو، كە دەكرێ‌ ئەم دوو وڵاتە لەڕێی دانوستانەوە بگەنە ئەنجامێكی ئەرێنی و ئەمریكای بەوە دڵنیا كردەوە كە ئێران ناخوازێ‌ چەكی ئەتۆمی بەدەست بێنێت و لەبەرامبەردا كۆماری ئیسلامی ئێرانیشی دڵنیا كردەوە كە ئیدارەی سەرۆك ترەمپ ناخوازێ‌ كێشەكان لەڕێی جەنگ و زمانی چەكەوە چارەسەر بكرێن. ئەم پەیامە و باسكردنی هەڵوێستی كۆشكی سپی بەرامبەر بە تاران لە دوای تەنها یەك هەفتە دێت لەسەردانی سەرۆك بافڵ تاڵەبانی بۆ ئەمریكا و ئەنجامدانی زنجیرەیەك دیدار لەگەڵ بەرپرسانی ئەو وڵاتە، بۆیە پێدەچێت پەیامەكەی زیاتر زانیاری بێت لەوەی كە بۆچوون و راڤەكردنێكی سیاسی بێت. لەسەر كۆی پرسەكان گەشبین و پشت بەستن بە گرتنەبەری دانوستان و گەیشتن بە ئاشتی بوو، تەنها لەسەر یەك پرس دوو بژاردەی خستە ڕوو ئەویش پرسی هێرش و درۆنەكانی گروپە چەكدارەكان بوو بۆ سەر كێڵگەی غازی كورمۆر لە چەمچەماڵ. بژاردەی یەكەم وازهێنانە لەو هێرشانە و لەناو هێزە فەرمیەكانی عێراق رێكبخرێن، ئەگەر ئەوە نەكرا و بەردەوامبوون لەسەر پەلامارەكانی خۆیان ئەوا وەڵامیان دەدەینەوە، ئەم هەڵوێست و هەڕەشەی سەرۆكی یەكێتی بەغدای پایتەخت بەرامبەر بە گروپە چەكدارە نایاساییەكانی عێراق جددیەتی نیگەرانی و بێزاری یەكێتیی نیشتمانیی كوردستان بەرامبەر بەو هێرشانە دەردەخات، كە بێ دەنگی سنوری خۆی هەیە و هەموو بێ دەنگییەك بە مانای بێ دەسەڵاتی و بێ توانایی ناگەیەنێت.