پەیامەكەی سەرۆك بافڵ و بەڕێز ئۆجەلان، دوو پەیامی دیراسەكراوی سەدە.

پەیامەكەی سەرۆك بافڵ و  بەڕێز ئۆجەلان، دوو پەیامی دیراسەكراوی سەدە.

دیارە هەردوو پەیامەكە تەئكید لە ئاشتی و پێكەوە ژیان دەكەنەوە، ئەوەی كەمێك شارەزای مێژووی ڕزگاری و بەدەست خستنی ئازادی بوو بێت، دەبینێت بە پێی قۆناغەكان تێكۆشانی چەك و سیاسەت دوو جەمسەری تێكۆشانی ڕزگاری و ئازادی بوونە، بۆیە كوردیش دەبێت ووردتر خوێندنەوە بۆ پەیامەكەی ئۆجەلان و پشتگیری سەرۆك بافڵ جەلال تاڵەبانی بكات.

ئەگەر چی نەیارەكانی گەلی كوردی ستەم دیدە زمانی دیالۆگ و ئاخاوتن و لێك تێگەیشتنیان لە پرۆسەی بونیاد نانی وڵاتەكانیان نەك بڕوایان پێنەبووە بگرە نەشیان ویستووە، بۆیە كورد و شۆڕشەكانیانی بە ناچاری دەستی بۆ چەك بردووە، بەڵام قۆناغی سیاسی و بەڕێوەبردنی دنیا و دنیا بینی ئێستای نەیارەكانی كورد گۆڕاوە، زمانی دیالۆگ و ئاخاوتن و پێكەوە ژیانی ئاشتیانە جێگەی چەك و ئاگر و كوشت و بڕی گرتووەتەوە، كە ئەوەش قۆناغە دڵخوازەكەی عەقڵانیەتە بۆ بەڕێوەبردنی دنیا و دۆزی كوردیش لەو نێوەندەدا جێگەی گرتووە.

 بۆیە پەیامەكەی بەڕێز ئۆجەلان، لەو پەڕی تێگەیشتنیەوە ڕایگەیاندوە، دیراسەی گۆڕانكارییەكانی دنیای كردووە، بۆیە لەبری دەنگی چەك و بۆنی باروت و لێدانی سەنگەر، دەنگی یاسا و بۆنی كوردایەتی لە ناوجەرگەی باكوری كوردستانەوە دەست پێكردووە، سەنگەریشی گواستووەتەوە پەڕلەمانی وڵاتەكەی بۆ سەندنی مافی گەلەكەی.

 پشتیوانی و پەیامەكەی سەرۆك بافڵ جەلال تاڵەبانی سەرۆكی یەكێتیی نیشتیمانیی كوردستان- یش، ئەو سیاسەت و ستراتیجە هەمیشەییەی سەرۆك مام جەل و یەكێتیی بووە كە بەدرێژایی مێژووی ڕزگاری خوازی خۆی بەرزیكردووەتەوە، لە ئاشتیدا كۆتری سپی و شنەی باین، لەشەڕیشدا پڵنگین و ڕەشەباین، بۆیە یەكێتیی لە هەموو قۆناغەكاندا پشتیوانی شۆڕشەكانی هەرچوارپارچەكەی كوردستانی كردووە، وە باجیشی داوە، بۆیە سەرۆك بافڵ پەیامەكەی تەواو پەیامێكی نیشتیمانی و نەتەوەییە و گۆشكراوی ڕابەرە مەزنەكەی گەلی كورد سەرۆك مام جەلال-ە، كە لەدوای چەندین ساڵی شۆڕشگێڕی زمانی دیالۆگ و سەروەربوونی یاسا و شەڕی دەستوری كردە سەنگەری پاراستنی میلەتەكەی.

 بۆیە دەڵێم، دوو پەیامی مێژووی و هەڵكەوتەی ئەو پەڕی ووردبینی و دنیا بینی دوو سەركردەی كوردم بینی.

 پێشڕەو مەلاوەیسی
ڕۆژنامەنوس و میدیاكار