گریام بۆ ئاهەنگی نەورۆزی دیاربەکر

 کە ئاهەنگ و ئاهەنگێڕانی نەورۆزی گەلی کوردم لە دیاربەکری باکوری کوردستان بینی لەکەشێکی  پڕ  جۆش وخرۆشی دەربڕینی شادی و کوردایەتی.
وەلێ، ئەوەی لە ڕوخساریاندا دەبینرا گریاندمی، فرمێسکەکانم بەهۆی خەم و پەژارەمەوە نەبوون، بەڵکو بەهۆی ئەو ئازارانەوە بوو کە  ئەم گەلە چاکە بە درێژایی مێژووی خۆیان بەرگەیان گرتووە و لێرەش ئەمڕۆ سەرەڕای ئەو هەموو ئازارەی پێیدا تێپەڕیون، وا  بەجۆش وخرۆشەوە جەژنەکەیان دەگێڕن.
نەورۆز تەنها ئاهەنگی ساڵێکی نوێ و هاتنی بەهار نییە، بەقەد ئەوەی هێمای ئازادی و قوربانیدان و خۆڕاگرییە لە بەرامبەر ستەمدا. 
هەرچەند ئەوان نەیاندەتوانی لەم جەژنەدا خۆشحاڵی خۆیان دەرببڕن  تا دوای چەندین ساڵ لە ئازار.  ئەوان تووشی ستەم و پەراوێزخستنی زۆر بوون لەلایەن دەسەڵاتدارانەوە کە هەوڵیان دەدا هەر دەرکەوتێکی ئاهەنگێڕانی تایبەت بە بوەن وناسنامەیان؛ سەرکوت بکەن، و ڕێگرییان لێبکەن لە دەربڕینی کولتوور و مێژووی خۆیان.

بۆ ئەوان نەورۆز  لە فێستیڤاڵێک زیاتر بوو،  نیشاندانی سەرکەوتن بوو بەسەر سەختییەکانی ژیانی کوردبوون و کوردایەتی، و ئاماژەیەک بوو بۆ پابەندبوونیان بە ژیان و مافە ڕەواکانیان، وەک مرۆڤ، ئەمەش بووە هۆی ئەوەی کاریگەرییەکی قووڵ لە ناو دڵ و سۆزی مرۆڤە خاوەن هەست و سۆزەکان دروست بکات،  ئەو خۆشییەی لە چاوەکانیانیاندا دەخوێندرایەوە تەنیا بەختەوەرییەکی تێپەڕ نەبوو، بەڵکو تێکەڵەیەک بوو لە هیوا و قوربانیدان.
 دەربڕینی بەرخۆدانێکی درێژخایەن و قووڵ بوو لە بەرامبەر چەوسانەوە و سەرکوتکردن.
لەم ڕۆژەدا ئاهەنگێڕانی نەورۆز لە شارەکە گردبوەنەوە و لە ژماردن نەئەهاتن، شەقامەکانی دیاربکر رازێنرا بوەنەوە وگۆرانی و سروودی خۆڕاگری وبەرخودانی کوردی  لە هەموو شوێنێک دەنگی دەدایەوە و ڕەنگە گەشەکان دەستیان کرد بە ڕازاندنەوەی ئاسۆ، وەک ئەوەی چیرۆکی گەلێک بگێڕنەوە کە ئازاریان چەشتووە بەڵام هێشتا بەرز ڕاوەستاون.  شادییەکی پاکم لە ڕووخساریاندا بینی، نەک هەر لەبەر ئەوەی دەیانتوانی ئاهەنگی نەورۆز بگێڕن، بەڵکو لەبەر ئەوەی ساتێکی سەرکەوتنیان بۆ کولتوور و ناسنامەکەیان ئەزموون دەکرد.
هەرچەند  هێشتا دوودڵی بەڕوخساری ئاهەنگێڕانەوە دیاربوو ، دوودڵی ساتەگەلێک کەبیریان دەهاتەوە لە ڕابردوودا بەرگەی چییان گرتووە. ئەوان بە قۆناغەکانی ستەم و وێرانکاریدا تێپەڕیون، لە پێناو پاراستنی کەرامەتی خۆیاندا زۆرێک لە خەون و ژیانیان لەدەستدا.
لەگەڵ هەموو نمایشێکی ئاهەنگێڕاندا یادەوەرییەکی بە ئازار لە پشت  پێکەنین وخۆشیەکانیانەوە دەبینرا، وەک ئەوەی هێشتا برینە کۆنەکانیان ساڕێژ نەبووبن.
وەلێ، سەرەڕای هەموو ئەمانە، ئەوەی گەلی کورد جیادەکاتەوە، هێز و ئیرادە و مکوڕ بوونیانە لەسەر ژیانکردن بە ئازادی .
 نەورۆز دەربڕینی ئیرادەی ئەوان بوو، لە ڕەتکردنەوەی هەر هەوڵێک بۆ سەرکوتکردن و هاشاکردن لە ناسنامە و پەراوێزخستنیان .
 ساتەوەختی بنیادنانەوەی خۆد و مافی ژیان  بە شادی وبێ ترس و سنووردارکردن، بوو.
گریام چونکە لە روخساریاندا هەموو ئەو قوربانیانەم بینی کە لە پێناو کورد بوونیاندا بەخشیبوویان، لە ئاهەنگ و خۆشی دەربڕینەکانیاندا  ئەو هێما قووڵەم بینی کە لە دووتوێی  ئەم بۆنە مەزنەدا هەڵیانگرتبوو.
  گریام، چونکە تێگەیشتم شادی ڕاستەقینە دوای ئازار دێت.
 گەلێک کە لە ناخیاندا میراتێکی درێژخایەنی لە خەبات و بەرخودان هەڵگرتبێت، ناتوانرێت شکستیان پێ بهێنرێت.
 لە کۆتاییدا نەورۆز لە شاری دیاربەکر تەنها ئاهەنگێک نەبوو، بەڵکو بەرجەستەکردنی بەرخۆدانی گەلێکی زیندوو بوو، کە مێژووی خۆیان لەبیر نەکردوە و دەستبەرداری مافەکانیان نەبوونە. 
گریام، چونکە ئەم گەلە شایەنی ئەوەن ئاهەنگیان بۆ بگێڕدرێت و بناسرێنەوە و  خۆشیەکانیان دوای ئەو هەموو ئازارەی پێیدا تێپەڕیون؛ نەسڕدرێتەوە.