ئەنجومەنی پارێزگای نەینەوا: ئەو بڕیارانەی دراون دروست و یاساین و جێبەجێدەکرێن

ئەنجومەنی پارێزگای نەینەوا راگەیەندراوێک بلاودەکاتەوەو تێیدا ئاماژە بەوەدەکات، ئەو بڕیارانەی دراون سەرجەمیان دروست و یاساین و جێبەجێدەکرێن.
ئەنجومەنی پارێزگای نەینەوا لە راگەیەندراوێکدا وەڵامی دەستەی باڵای هەماهەنگی نێوان پارێزگاکانی عیراقی دایەوەو رایگەیاند، بەگوێرەی ماددەی 8 لەیاسای پارێزگا نەبەستراوەکان بە هەرێمەکانەوە گۆڕینی قایمقام و بەڕێوەبەری ناحیە لە تایبەتمەندی ئەنجوومەنی پارێزگایەو گۆڕانکارییەکان جێبەجێدەکرێن.
هاوکات ئاماژەی بەوەشداوە، ئەنجومەنەکە تایبەتمەندییە دەستووری و یاساییەکانی پەیڕەوکردووە، ئەو بڕیارانەی دراون لەلایەن ئەنجوومەنەکەیانەوە، درووستن و یاسایین.
هەروەها لە راگەیەندراوەکەدا هاتووە، بەگوێرەی ماددەی 8 لەیاسای پارێزگا نەبەستراوەکان بە هەرێمی کوردستانەوە، ژمارە 21ـی ساڵی 2008ـی هەموارکراو، لە تایبەتمەندی ئەنجوومەنی پارێزگاکانە، هەڵبژاردنی قایمقام و بەڕێوەبەری ناحییە، بەزۆرینەی دەنگی ئەندامانی ئەنجوومەنەکە بووە.
لەلایەکی ترەوە، دەستەی هەماهەنگی نێوان پارێزگاکانی عیراق نوسراوێکی ئاراستەی ئەنجوومەنی پارێزگای نەینەوا کردو تیایدا گۆڕانکارییەکانی ئەنجوومەنەکەی راگرت و داوای لە ئەنجوومەنی پارێزگای نەینەوا کرد پەلە لە گۆڕانکارییە ئیدارییەکان نەکەن.
رۆژی  سێشەممەی رابردوو ئەنجوومەنی پارێزگای نەینەوا کۆبووەوەو گۆڕانکاری لە 20 پۆستی قایمقام و بەڕێوەبەری ناحیەی پارێزگاکەدا کرد، لەنێویاندا قایمقامی شنگال و مەخموری هەڵبژارد دواتر هەریەکە لە فراکسیۆنی پارتی و نەینەوای یەکگرتوو بایکۆتی کۆبوونەوەکەیان کرد و دواتر فراکسیۆنی پارتی رایگەیاند، ئەندامێتی خۆی لە ئەنجوومەنی پارێزگای نەینەوا هەڵدەپەسێرێت.