له‌ شه‌نگال درۆنی توركیا ئۆتۆمبیلێكی بۆردومان كرد

درۆنه‌كانی توركیا ئۆتۆمبێلێكیان له‌ چیای شنگال بۆردومان كردو سووتا، به‌ڵام تائێستا زیانه‌ گیانییه‌كان رانه‌گه‌یه‌ندراوه‌.


به‌پێی سه‌رچاوه‌كانی هه‌واڵ دوانیوه‌ڕۆی ئه‌مڕۆ یه‌كشه‌ممه‌ 10 تشرینی دووه‌می 2024 درۆنه‌كانی توركیا ئۆتۆمبێلێكیان له‌ لۆفەکانی چیای شنگال بۆردومان كردو به‌ ته‌واوی سووتا، به‌ڵام سه‌باره‌ت به‌ زیانه‌كان هیچ لایه‌نێك زانیاریی ئاشكرانه‌كردووه‌.

به‌ گوێره‌ی ئه‌و ڤیدیۆیه‌ی كه‌ له‌ میدیاو سۆشیال میدیا بڵاوكراوه‌ته‌وه‌، ئۆتۆمبێله‌كه‌ له‌ جۆری ساڵۆن (قه‌مه‌ره‌)یه‌ و به‌ته‌واوی سوتاوه‌ و تیمه‌كانی به‌رگری شارستانی شه‌نگال سه‌رقاڵی كوژراندنه‌وه‌ی ئاگره‌كه‌ن.

ئه‌مه‌ له‌كاتێكدا كۆتایی مانگی ڕابردوو هێزی ئاسمانی سوپای توركیا بۆردومانی ناوچه‌كانی  هه‌رێمی كوردستان ده‌كات.