بڕیارە سبەینێ ئۆجه‌لان پەیامێکی ڤیدیۆیی بڵاوبکاتەوە

بڕیاربوو ئه‌مڕۆ په‌یامه‌كه‌ی ئۆجه‌لان له‌باره‌ی پرۆسه‌ی ئاشتیی له‌توركیا و باكوری كوردستان بڵاوبكرێته‌وه‌، به‌ڵام بڵاوكردنه‌وه‌كه‌ی كه‌وتوه‌ته‌ سبه‌ینێ،  بەپێی زانیارییەکانیش ئه‌مجاره‌ ئۆجه‌لان له‌په‌یامێكی ڤیدیۆییدا ده‌رده‌كه‌وێته‌وه‌.
بەپێی زانیارییەکان وەفدی ده‌م پارتی دوێنێ له‌ ئیمراڵی له‌گه‌ڵ عه‌بدوڵڵا ئۆجه‌لان كۆبوووەتەوە و دواتر په‌یامێكی ڤیدیۆیی تۆماركراوه‌.
سەرچاوەیەکی ئاگادار ئەوەی بڵاوکردووەتەوە توركیا تاڕاده‌یه‌ك ڕه‌زامه‌ندیی نیشانداوه ‌و لە کۆبوونەوەی وه‌فدی ده‌م پارتی ‌و ئه‌ردۆغانیشدا په‌یامه‌ ڤیدیۆییه‌كه‌ی ئۆجه‌لان یه‌كێك له‌ته‌وه‌ره‌كان ده‌بێت.
به‌وته‌ی سه‌رچاوه‌كه‌، په‌یامه‌ ڤیدۆییه‌كه‌ تایبه‌ته‌ به‌پرۆسه‌ی ئاشتیی له‌توركیاو باكوری كوردستان ‌و په‌یامی زۆر گرنگی هه‌م بۆ په‌كه‌كه ‌و حكومه‌تی توركیا تێدایه‌
به‌هه‌موو ئه‌گه‌رێكه‌وه‌ سبه‌ینێ په‌یامه‌ ڤیدیۆییه‌كه‌ی بڵاوده‌كرێته‌وه‌، به‌ڵام ئه‌گه‌ری ئه‌وه‌ش هه‌یه‌ په‌یامه‌ ڤیدیۆییه‌كه‌ بكرێته‌ نوسین.
هەر لەو پەیامەدا ئۆجەلان باس لە ‌واده‌ی سوتاندن ‌و شكاندنی چه‌كه‌كانی یه‌كه‌م گروپی گه‌ریلا دەکات، بۆیە ‌تا ئه‌و په‌یامه‌ بڵاونه‌كرێته‌وه‌، ڕۆژی سوتاندن ‌و شكاندنی چه‌كه‌كانی گه‌ریلا نادیاره‌، په‌یامه‌كه‌ی ئۆجه‌لان، ئه‌و ڕۆژه‌ بۆ گه‌ریلا دیاریده‌كات.