وەزیری كشتوكاڵی عیراق پێشبینی دەكات بەرهەمی گەنمی ئەمساڵی وڵاتەكەمان بەربەستی 7 ملیۆن تۆن تێپەڕێنێت.
عەباس مالكی، وەزیری كشتوكاڵی عیراق لە دیدارێكدا لەگەڵ ژمارەیەك توێژەری بەریتانی بواری كشتوكاڵ لە لەندەن رایگەیاند، عیراق بەرەو كشتوكاڵی زیرەك هەنگاو دەنێت و لەو رێگەیەوە دەتوانێت بگاتە ئاستی خۆژێنی لەبەرهەمی كشتوكاڵیدا، جگەلەوەش كاردانەوەی ئەرێنی دەبێت بەرهەمە سەرەكییەكان وەك گەنم و سەوزە.
ئەوەشیخستەڕوو، پێشبینی دەكەن بەرهەمی گەنمی ئەمساڵی وڵاتەكەمان بەربەستی 7 ملیۆن تۆن تێپەڕێنێت، ئەوەش لە كاتێكدایە بەرهەمی گەنمی ساڵی رابردوو پێنج ملیۆن تۆن بووە و تەواوی پێداویستی عیراقیش بۆ ئەو بەرهەمە كەمتر لە پێنج ملیۆن تۆنە.
وەزیری كشتوكاڵی عیراق ئاماژەی بەوەشكرد، عیراق دەیەوێت پرۆگرامێكی هاوبەشی هەبێت لەگەڵ تاقیگەكانی بەریتانیا لە بواری كشتوكاڵیدا.
ئەوەش لەكاتێكدایە رۆژی یەك شەمە 21ی نیسانی 2024، وەكو یەكەم ناوچەی كشتوكاڵی عیراق لە پارێزگای كەربەلا، وەرزی دروێنەكردنی گەنم دەستپێكردو پێشبینیشدەكرێت، ئەمساڵ پارێزگاكە 200 هەزار تۆن گەنم بەرهەمی هەبێت.
Copyright © 2020 Kirkuk Tv All Rights Reserved Designed And Developed By AVESTA GROUP