ئەمریکا بۆ ماوەی ساڵێکی دیکە باری نائاسایی لە سوریا درێژکردەوە

کۆشکی سپی ئاشکرایکرد کە بۆ ماوەی ساڵێکی دیکە باری نائاسایی لە سوریا درێژکردوەتەوە و جەختیش دەکاتەوە کە پێویستە بەشار ئەسەد توندوتیژییەکانی لە سوریا رابگرێت و ئاگربەستی سەرتاسەریی رابگەیەنێت.
کۆشکی سپی ئەمەریکا لە بڵاوکراوەیەکی ڕەسمیدا ڕایگەیاند: دڕندەیی و سەرکوتکردنی حکومەتی سوریا نەک تەنها مەترسییە بۆسەر خەڵکەکەی بەڵکو دەبێتە هۆی دروستکردنی ناسەقامگیریی لە تەواوی ناوچەکە و هەربۆیە بۆ جارێکی دیکە باری نائاسایی لە وڵاتەکە بۆ ماوەی ساڵێکی دیکە درێژ دەکرێتەوە.
کۆشکی سپی ئەوەشدەخاتەڕوو: توندوتیژیی و پێشێلکارییەکانی مافی مرۆڤ لە سوریا و لەلایەن بەشار ئەسەد ئیدانە دەکەین و داوا دەکەین بەزووترینکات رژێمی سوریا شەڕو کوشتاری وڵاتەکە دژی گەلەکەی خۆی رابگرێت و ئاگربەستی سەرتاسەریی رابگەیەنرێت تا گەیاندنی هاوکارییە مرۆییەکان هیچ بەربەستێکیان لەبەردەمدا نەمێنێت.
ئاماژە بۆ ئەوەشکراوە: ئەمەریکا گۆڕانکارییەکان لە سیاسەتی سوریا و رژێمەکەی لە داهاتودا لەبەرچاو دەگرێت بۆ بەردەوامبون یاخود درێژەدان بە راگەیاندنی باری نائاسایی لەو وڵاتە لە داهاتودا.