هیومان ڕایتس وۆچ: فەرمانی چۆڵکردنی غەززە له‌لایه‌ن ئیسرائیله‌وه‌ تاوانی جەنگە

ڕێکخراوی هیومان ڕایتس وۆچ لە ڕاپۆرتێکدا رایگه‌یاند، فەرمانەکانی چۆڵکردنی کەرتی غەززە له‌لایه‌ن ئیسرائیله‌وه‌ گه‌یشتوه‌ته‌ "تاوانێکی جەنگ" کە بە "ئاوارەی زۆرەملێ" لە هەندێک ناوچەدا ناوده‌برێت و لە ناوچەکانی دیکەشدا بە "پاکتاوی نەتەوەیی".
ڕێکخراوەکە لە ڕاپۆرتێكدا باسی له‌وه‌كرد، بەڵگەی کۆکردوەتەوە کە بەرپرسانی ئیسرائیل تاوانی جەنگی ئاوارەبونی زۆرەملێ ئەنجام دەدەن و "پێدەچێت کارەکانی ئیسرائیل لەگەڵ پێناسەی پاکتاوی نەتەوەیی لەو ناوچانەدا بگونجێت کە فەڵەستینییەکان ناتوانن بگەڕێنەوە بۆیان".
بەوتەی توێژەری ڕێکخراوەکە، نادیە هاردمان، دەرەنجامەکانی ڕاپۆرتەکە لەسەر بنەمای چاوپێکەوتن لەگەڵ ئاوارەکانی غەززەو  وێنەی مانگی دەستکرد و ڕاپۆرتە گشتییەکانە کە تا مانگی ئابی 2024 پێشکەش کراون، بڵاوكراوه‌ته‌وه‌.
لە كاتێكدا کە ئیسرائیل دەڵێت ئامانجی ئاوارەبونەکە پاراستنی خەڵکی سڤیله‌ یان بە هۆکاری سەربازیی بەپەلەیه‌، به‌ڵام توێژەره‌كه‌ی  هیومان ڕایتس وۆچ وه‌ڵامی ده‌داته‌وه‌ و ده‌ڵێت، "ئیسرائیل ناتوانێت تەنها پشت بە بونی گروپە چەکدارەکان ببەستێت بۆ پاساوهێنانەوە بۆ ئاوارەبونی هاوڵاتیانی مەدەنی".
بەپێی ئاماری نەتەوە یەکگرتوەکان، لە مانگی تشرینی یەکەمی 2024ەوە لە کۆی دو ملیۆن و 400 هەزار کەس، ملیۆنێك و 900 هەزار کەس ئاوارە بون.