سوپای ئەمریکا بۆردومانی كۆگاكانی چه‌كی حوسییەکان دەکات

فەرماندەیی ناوەندیی ئەمریکا هێرشكردنه‌ سه‌ر ناوچەی حوسییەکان له‌ یه‌مه‌ن ڕاگه‌یاند و ده‌ڵێت، كۆگای چه‌كی ئه‌و هێزه‌یان كردوه‌ته‌ ئامانج.
فەرماندەیی ناوەندیی ئەمریکا له‌ ڕاگه‌یه‌ندراوێكدا باسی له‌وه‌كردوه‌، "هێرشی ئاسمانی وردمان كرده‌سەر کۆگاکانی چەکی سەر بە حوسییەکان لە ناوچەکانی ژێر دەسەڵاتی ئەوان لە ناوخۆی یەمەن".
ئاماژەی بەوەشکردوە، ئامانجەکانی هێرشەکان لاوازکردنی توانای حوسییەکان بوە بۆ هەڕەشەکردن لە هاوبەشە ناوچەییەکان.
لە تشرینی دوەمی 2023ەوە حوسییەکان لە یەمەن لە دەریای سوردا هێرش دەکەنە سەر "کەشتییە ئیسرائیلییەکان یان ئەوانەی بەرەو ئیسرائیل دەڕۆن"، وەک پشتیوانی لە غەززە و پشتیوانی لە گەلی فەڵەستین.
لە بەرامبەریشدا ئەمریکاو هاوپەیمانەکانی هێزێکی سەربازییان پێکهێنا بۆ مامەڵەکردن لەگەڵ هێرشەکانی حوسییەکان، فڕۆکەکان چەندین هێرشیان کردە سەر ناوچە جیاجیاکانی یەمەن، لەکاتێکدا سوپای ئەمریکا ناوبەناو ئەرکەکانی بەجیا لە هەر هاوپەیمانییەکی دەریایی لە ناوچەکە ئەنجام دەدات.