پشووی ئەو فەرمانبەرانەی گەڕاونەتەوە ناوچە کوردستانییەکان درێژکرایەوە

وەزارەتی ناوخۆی حکومەتی هەرێمی کوردستان رایگەیاند: بە مەبەستی تەواوکردنی پرۆسەی سەرژمێری، پشووی فەرمانبەر و ئەفسەر و کارمەندان، ئەوانەی خەڵکی ناوچەکانی سنووری ماددەی 140 ن بۆ بەشداری کردن لە پرۆسەکە گەڕاونەتەوە ناوچەکانی خۆیان، تا 10ی کانوونی یەکەم درێژدەکرێتەوە.
ئاشکراشیکرد: ئامانج لە درێژکردنەوەی پشووەکە بۆ ئەوەیە فۆڕمی دووەم لە دوای قەدەغەی هاتووچۆ پڕبکەنەوە.
وەزاتی ناوخۆ دەڵێت، لەدوای تەواوکردنی فۆرمی یەکەم لە رۆژانی 20و 21ی مانگ، قۆناخێکی دیکە دەست پێدەکات و پرسیار و زانیاری زیاتری تێدایە و پێویستە لەو کاتەی بژمێرەکان سەردانی خێزانەکان دەکەنەوە لایەنی کەم یەکێک لە ئەندامانی خێزان لەو شوێنانە بمێننەوە و هەموو بەڵگەنامەکانی ئەندامانی خێزانەکەیانی لابێت و فۆرمی دووەم بە دروستی پڕبکەنەوە، بۆیە رێگە بەو کەسانەش دەدرێت لە ناوچەکانیان بمێننەوە.
حکومەتی هەرێمی کوردستان، پشووی ئەو کەسانە بە کراوەیی دەهێڵێتەوە و دەرفەتیان دەدرێتێ تاوەکو ئەو کاتەی بژمێرەکان دووبارە سەردانیان دەکەنەوە تاوەکو هەموو پرۆسەی سەرژمێری تەواودەبێت.

‎‎