عیراق بانكێكی نوێ بۆ شوێنگره‌وه‌ی بانكی ڕافیده‌ین داده‌مه‌زرێنێت

عێراق بانکێکی نوێ بەناوی بانکی یەکەمی ڕافیدەین دادەمەزرێنێت، دەبێتە تەواوکەری کارەکانی بانکی ڕافیدەین، ئەم هەنگاوەی ئەنجومەنی وەزیرانیش بۆ خۆگونجاندنە لەگەڵ ئەو پێشکەوتنەی لەکەرتی بانکیدا هاتووەتە ئاراوە.

ماوەیەکی زۆرە حکومەتی عێراق لەژێر چاودێریی لایەنی نێودەوڵەتییدا سەرقاڵی ڕێکخستنەوەی کارەکانی بانکی ڕافیدەینە، بەڵام به‌گوێره‌ی دوایین ڕاپۆرتی لیژنەی تایبەت، دەرکەوتووە بانکی ڕافیدەین بەو توانایەی ئێستا هەیەتی ‌و بەو شێوازی کارەی په‌یڕەوی دەکات، ناتوانێت خۆی لەگەڵ مەرجە نێودەوڵەتییەکاندا بگونجێنێت.

یەکێک لەو مەرجانە ئەوەیە بانکەکە نابێت سەر بەحکومەت بێت، دەبێت بەشداریی کەرتی تایبەتی تێدابێت ‌و سەرمایەکەشی زیاتربێت لەوەی هەیە.

بۆ ئەو مەبەستە، ئەنجوومەنی وەزیرانی عێراق بڕیاریداوە بانکێکی دیکە بەناوی بانکی یەکەمی ڕافیدەین بەسەرمایەی یەک تریلیۆن دینار دابمەزرێنێت.

به‌گوێره‌ی بڕیارەکەی ئەنجوومەنی وەزیران، بانکەکە لەشێوەی پشکداریی دەبێت ‌و دامەزراوە حکومییەکان، کەرتی تایبەت ‌و خەڵکی ئاسایی دەتوانن پشکیان لەبانکەکەدا هەبێت.

سەرۆک وەزیرانی عێراق، بانکی ناوەندیی ڕاسپاردوە بۆئەوەی ڕاوێژ لەدامەزراوە نێودەوڵەتییەکان وەربگرێت بۆ دامەزراندن ‌و ئاراستەکردنی کارەکانی بانکە نوێکە.