شێخ جەعفەر شێخ مستەفا لێپرسراوی ئەنجومەنی پاراستنی بەرژەوەندییە باڵاکانی یەکێتیی نیشتمانیی کوردستان بەبۆنەی هاتنەوەی جەژنی نەورۆزو سەرەتای ساڵی نوێی كوردییەوە، كە هاوزەمانە لەگەڵ یادی 34 ساڵەی ئازادکردنی شاری كەركوكی قودسی كوردستان، گەرمترین پیرۆزبایی ئاراستەی كۆمەڵانی خەڵكی كوردستان و تەواوی كوردانی نیشتەجێی وڵاتانی جیاجیای جیهان دەكەم.
شێخ جەعفەر شێخ دەڵێت: لە نەورۆزی ساڵی 1991دا راپەڕینی خەڵکی کوردستان، بەئازادکردنی شاری کەرکوک تاجی سەرکەوتنی لەسەرنا و سەرەتای قۆناغێکی نوێی لە تێکۆشانی رزگاریخوازانەی گەلی کوردستاندا هێنیایەئاراوە کە دواتر بەچەند قۆناغێکی تری راپەڕین هەڵبژاردنی پەرلەمان و دامەزراندنی حکومەتی هەرێمی کوردستانی لێ بەدیهات.
شێخ جەعفەر ئەوەش دەڵێت: كە نەورۆز، هێمای سەرکەوتنی ئیرادەی ئازادیخوازان و شکستی زوڵم و ستەم و چەوساندنەوەی مرۆڤە لەلایەن دەسەڵاتدارانی ستەمکارەوە، هاوکات نیشانەی کۆتایی هەژموونی وەرزی زستان و سەرکەوتنی بەهار و نوێبوونەوەی سروشتە. لەنێو نەتەوەی كوردیشدا نەورۆز سیمبولی خەباتی نەتەوەیی و رووبەڕووبوونەوەی دەسەڵاتی ستەمکارانەی داگیرکەرانە.
شێخ جەعفەر لە كۆتایشدا دەڵێت: هیوادارم هەمووان ئەم جەژنە نەتەوەییە بکەین بە دەرفەتێک بۆ ئەوەی بەگیانێكی كوردانەوە کاری جددی بکرێت بۆ دروستکردنی یەكدەنگیی و یەكڕیزیی خەڵک و لایەنە سیاسیەکانی کوردستان، بەتایبەتی لەم هەلومەرجە ئیقلیمی و نێودەوڵەتییە هەستیارداو سەرەنجام پاراستنی بەرژەوەندییە باڵاكانی نەتەوەكەمان و پێكهێنانی حكومەتێكی كاراو خزمەتگوزار کە وەڵامدەرەوەی پێویستییەکانی ژیان و گوزەرانی هاوڵاتیان بێت دووبارە، جەژنی نەورۆزتان پیرۆزبێت و هەمیشە بەختەوەربن.
Copyright © 2020 Kirkuk Tv All Rights Reserved Designed And Developed By AVESTA GROUP