ئاژانسی هەواڵی ڕۆیتەرز بڵاویكردەوە، دانوستانەكان بۆ دەستپێکردنەوەی هەناردەکردنەوەی نەوتی هەرێمی كوردستان لە رێگەی توركیاوە گرفتی بۆ دروستبوە بەهۆی ناڕونی لە پارەدان و گرێبەستەكان. هەروەها كۆمپانیاكانی نەوتی هەرێمیش دەڵێن، هەناردەکردن دەستپێناکاتەوە تاوەکو بەغدا بەڵێنی تەواویان لەبارەی شایستەكانیانەوە پێنەدات.
ئاژانسی هەواڵی ڕۆیتەرز، ئەمشەو لە زاری دوو سەرچاوەی ئاگادارەوە كە نەیانویست ناویان ئاشکرا بکرێت بڵاویكردەوە، گفتوگۆکان بۆ دەستپێکردنەوەی هەناردەکردنی نەوتی هەرێم لە ڕێگەی بۆریی عێراق - تورکیا ڕاوەستاوە و گرفتی بۆ دروستبوە، بەهۆی بەردەوامی نەبونی ڕونکردنەوە لەبارەی شایستە و گرێبەستەکانەوە .
ئاماژەی بەوەشكرد، کۆمپانیای ئەپیکور کە گروپێکە لە هەشت کۆمپانیای نەوتی پێكدێت کە لە کوردستانی عێراق کاردەکەن، هەناردەکردن دەستپێناکەنەوە تاوەکو بەغدا بە گوێرەی گرێبەستی یاسایی و رێنماییە بازرگانییەکان، گرەنتی پارەی هەناردەی رابردو و داهاتویان نەكات.
ئەوە لەكاتێكدایە حەیان عەبدولغەنی، وەزیری نەوتی عێراق ڕۆژی 28ـی مانگی رابردو رایگەیاند، "لە چەند سەعاتی داهاتودا دەستپێکردنی هەناردەکردنی نەوتی هەرێم لە ڕێگەی کۆمپانیای بە بازاڕکردنی نەوت (سۆمۆ) ڕادەگەیەنن".
Copyright © 2020 Kirkuk Tv All Rights Reserved Designed And Developed By AVESTA GROUP