موقتەدا سەدر: تاوەکو گەندەڵی هەبێت بەشداریی پرۆسەی هەڵبژاردن ناکەم

موقتەدا سەدر رێبەری رەوتی نیشتمانیی شیعە رایگەیاند، تاوەکو گەندەڵی لە ئارادا بێت بەشداری پرۆسەی هەڵبژاردن ناکات، داوا لە لایەنگرانیشی دەکات بەشداریی هەڵبژاردن نەکەن و خۆیان کاندید نەکەن.
سەدر لە وەڵامی پرسیاری لایەنگرێکی سەبارەت بە بۆچوون و بەشدارییکردنیان لە پرۆسەی هەڵبژاردندا نووسیویەتی، هەڵبژاردن لە عێراق تەنها بۆ بەرژەوەندیی حزبی و تائیفییە و بەشدارییکردن تیایدا هیچ سودێکی نییە.
موقتەدا سەدر، داوای لە لایەنگرانیشی کردووە بەشداریی هەڵبژاردن نەکەن و خۆیان کاندید نەکەن، چونکە هاوبەشیکردنی گەندەڵکاران هیچ سودێکی نییە، دەشڵێت، هێزی دەوڵەتی قوڵ هەموو جومگەکانی دەسەڵاتی داگیرکردووە.
ئەو قسانەی موقتەدا سەدر لەکاتێکدایە کۆمسیۆنی باڵای سەربەخۆی هەڵبژاردنەکانی عێراق، ئامادەکارییەکانی بۆ بەڕێوەچوونی هەڵبژاردنی پەرلەمانی عێراق دەستپێکردووە کە بڕیارە لە مانگی 10ـی ئەمساڵدا بکرێت، بەشێک لە سەرکردەی لایەنە سیاسییەکانیش جموجوڵەکانی خۆیان لەو بارەیەوە دەستپێکردووە.