سوپای ئیسرائیل: بۆردومانەکانی سوریا هۆشداریدانە بە تورکیا

شەوی رابردوو ئیسرائیل هێرشیکردە سەر هەرسێ پارێزگای دیمەشق و حومس و حەما، لە هێرشەکاندا سەنتەرێکی زانستی لە دیمەشق و دوو فڕۆکەخانەی لە حەما و گوندەواری حومس بە ئامانج گرت .
ئاژانسی هەواڵی سانا ئاشکرایکرد: شەوی رابردوو فڕۆکە جەنگییەکانی ئیسرائیل سەنتەرێکی توێژینەوەیان لە دیمەشق بۆردوومانکردووە، هاوکات ٧ جار فڕۆکەخانەی سەربازیی حەما بەئامانجگیراوە و هێرشکراوەتە سەر فڕۆکەخانەی تیفۆڕ لە حومس.
لەلایەکی دیکەوە، سوپای ئیسرائیل بڵاویکردەوە: هێرشەکانی شەوی رابردووی سەر سووریا، بۆ هۆشداریدانە بە تورکیا.
بەگوێرەی ئاماری روانگەی سووری بۆ مافەکانی مرۆڤ لەسەرەتای ساڵی 2025وە تاوەکو ئێستا ئیسرائیل 41 هێرشی بۆسەر خاکی سووریا ئەنجامداوە، 35 جاریان لەڕێگەی فڕۆکەی جەنگی و شەش جار لەڕێگەی هێرشی زەمینییەوە بووە و 48 کۆگای چەک و بنکە و ناوەندی سەربازیی بەئامانجگیراوە.