جارێکی دیکە دەنگدان لەسەر بە پارێزگابوونی هەڵەبجە بۆ دوای جەژن دواخرا

جارێکی دیکە دانیشتنی پەرلەمانی عێراق کە یەکێک لە بڕگە سەرەکییەکانی دەنگدان بوو لەسەر پڕۆژەیاسای بەپارێزگاکردنی هەڵەبجە، دواخرا.
دوێنێ شەو جارێکی دیکە لە دانیشتنی ئەنجوومەنی نوێنەرانی عیراقدا پرۆژەیاسای بەپارێزگابوونی هەڵەبجە تێنەپەڕێندرا و سەرۆکایەتیی پەرلەمانی عێراقیش دانیشتنەکەی بۆ دوای جەژنی رەمەزان دواخست.
دانیشتنەکە لە حەوت بڕگە پێکهاتبوو، سەرەکیترینیان دەنگدان بوو لەسەر پڕۆژەیاسای بە پارێزگاکردنی هەڵەبجە و خوێندنەوەی یەکەم بۆ پڕۆژەیاسای دەستەی حەشدی شەعبی، بۆ ئەو دانیشتنە 114 پەرمانتار ناویان تۆمار کردبوو بەڵام بۆ تێپەڕاندنی یاساکە پێویست بوو لانیکەم 166 ئەندام ئامادەبن.
پڕۆژەیاسای بە پارێزگاکردنی هەڵەبجە لە چوار مادە پێکهاتووە؛ یەکەم ماددە باسی بە پارێزگاکردنی هەڵەبجە دەکات وەک نۆزدەیەمین پارێزگای عێراق، کە ناوەندی پارێزگاکە شاری هەڵەبجە دەبێت، بەپێی مادەی دووەمیش ئەنجوومەنی وەزیرانی هەرێمی کوردستان سنووری یەکە ئیدارییەکانی پارێزگاکە دیاری دەکات.
پێش دانیشتنەکە، فراکسیۆنە کوردستانییەکان لە پەرلەمانی عێراق بڕیاریاندا ئەگەر دەنگ بە پڕۆژەیاسای بە پارێزگاکردنی هەڵەبجە نەدرێت، بەشداریی هیچ دانیشتنێکی دیکەی پەرلەمان ناکەن.