عیماد ئەحمەد لێپرسراوی مەکتەبی راگەیاندن و هۆشیاری پێشوازی لە حەمەی حەمە سەعید وەزیری رۆشنبیری هەرێم کرد .
لەدیدارێکدا لەتیف نێروەیی لێپرسراوی بۆردی راگەیاندن ئامادەبوو ، لەبارەی ئاستەنگەکانی بەردەم کاری میدیایی ، هەموو ئەو پرسانەی هەڕەشەن بۆ ئاشتی کۆمەڵایەتی و گفتوگۆییان لەبارەوەکراو دووپات لە هەماهەنگی هەموو لایەنە پەیوەندیدارەکان کرایەوە بۆ پاراستنی بنەما سەرەکییەکانی کاری راگەیاندن و فراوانکردنی مەودای ئازادی رادەربڕین و کەمکردنەوە و نەهێشتنی ئەو هەڕەشانەی میدیا لەکاری پیشەیی دوردەخاتەوە .
لەدیدارەکەدا عیماد ئەحمەد روونیکردەوە ، سیاسەتی یەکێتی روون و ئاشکرایە لەسەر هەموو ئەو پرسانەی پەیوەستن بە ئادابی گشتی و بەها کۆمەڵایەتییەکان و پاراستنی گیانی پێکەوەیی و برایەتی لەنێوان هەموو نەتەوەو پێکهاتەکاندا ، وەک هەمیشە وتوشمانە پشتیوان و داکۆکیکاری سەرسەختی ئازادی رادەربڕین و کاری میدیایی پیشەیی لەچوارچێوەی بنەماکانی رۆژنامەوانی و پاراستنی ئازادییە کەسییەکان دەبین و بێ مەرج هاوکاری قەڵەمە ئازاو ئازاد و بوێرەکانیش دەبین لە پێناو پێشخستنی هەرێمەکەمان و پاراستنی کۆڵەکەکانی دیموکراسی . بۆ یە ئەرکی هەمووانە لەبەرامبەر ئەو دیاردانەی دەبنە هۆی شێواندنی کولتوورەکەمان و دنەو هانی توندوتێژی و کوشتن و تێکدانی ئاسایشی کۆمەڵایەتیمان دەدەن بوەستینەوە و بە پرۆژەیەکی نیشتمانییەوەرووبەڕوویان ببینەوە .
لەبەرامبەردا بەڕێز حەمەی حەمە سەعید پاڵپشتی و هاوکاری وەزارەتی رۆشنبیری بۆ هەموو ئەو هەوڵانە دەربڕی کە داب و نەریت و بەهاو رێسا پیشەییەکان لە هەرێم دەپارێزن و ووتی ئەم دەستپێشخەرییەی مەکتەبی راگەیاندن و هۆشیاری جێگای دەست خۆشیمانە و بۆئەوەش سەرنج و پێشنیاری هەموو لایەنە پەیوەندیدارەکان لە میدیای لایەنەکان ، مامۆستایانی زانکۆ و ئەکادیمی و رۆژنامەنووسان و دامەزراوە میدیاییەکان ، سەنتەرو سەندیکاو رێکخراوەکانی پەیوەست بەکاری راگەیاندن وەردەگرین و بەهەماهەنگی هەنگاوێک دەنێین کە لەخزمەتی پێشخستنی ئەزموونەکەمان و گەشەپێدانی کاری میدیایی بێت هەروەک سوپاسی ئەو راگەیاندکارانەشیکرد کە بەرپرسیارانەو پابەند بە پیشەکەیانەوە درێژە بەکاری خۆیان ئەدەن .
Copyright © 2020 Kirkuk Tv All Rights Reserved Designed And Developed By AVESTA GROUP