کۆمسیۆن: ئەوانەی نەخۆشی شەکرەیان هەیە دەتوانن بەبێ پەنجەمۆر دەنگ بدەن

ئەندامێکی تیمی ڕاگەیاندنی کۆمیسیۆنی باڵای هەڵبژاردنەکانی عیراق دەڵێت لە هەڵبژاردنی خولی شەشەمی پەرلەمانی عیراقدا، تووشبووانی نەخۆشی شەکرە کێشەی دەنگدانیان نابێت و بێ پەنجەمۆر دەتوانن دەنگ بدەن، ئاشكراشی کرد لە هەموو بنکەکان بۆ وێنەگرتنی دەنگدەران کامێرای زیرەک دادەنرێت.
حەسەن هادی زایر، ئەندامی تیمی ڕاگەیاندنی کۆمیسیۆنی هەڵبژاردنەکانی عیراق رایگەیاند: بۆ هەڵبژاردنی خولی شەشەمی پەرلەمانی عیراق، بیرمان لە هەموو جۆرە گرفت و پێشهاتێکی نەخوازراو کردووەتەوە، لەوانە ئەو دەنگدەرانەی بەهۆی نەخۆشی شەکرە یان فشاری خوێن لە ئامێری ئەلیکترۆنی دەنگدان کێشەی خوێندنەوەی پەنجەمۆرەیان بۆ دروست دەبێت، چارە کراوە و دەتوانن بەبێ پەنجەمۆر دەنگ بدەن.
وتیشی: لە هەر بنکەیەکی دەنگداندا، کامێرای زیرەک دادەنرێت، ڕاستەوخۆ وێنەی دەنگدەرەکان دەگرێت، بەمەش دەتوانین بڵێین پرۆسەیەکی تەواو ڕێکوپێک بەڕێوە دەچێت و هیچ ڕێگەیەک بۆ سەختەکاری ناهێڵینەوە.