روانگەیەك بۆ داهاتووی كوردستان

یەكێتیی نیشتمانیی كوردستان بۆچی ئەوەندە پێداگری لە راستكردنەوەی رێڕەوی حكومڕانی هەرێم دەكات؟ گوتارەكە سیاسی و هەنووكەییە یان پێنگاڤێكە نیشتمانی و ستراتیژی؟ ئەم وتارە هەوڵئەدا پاڵپشت بەپوختەیەكی بەبنەما، لەگەڵ شیكردنەوەیەك سەبارەت بەگرنگی تێگەكە بۆ حكومڕانێتی داهاتووی كوردستان روون بكاتەوە.

لەڕووی تیۆرییەوە:
راستكردنەوەی رێڕەوی حكومڕانی، بەپێوەرە تیۆرییە زانستی و سیاسی و شێوازەكانی بەڕێوەبردن، پرۆسەیەكە نابێ لەهیچ كات و سات و سەردەم و دۆخ و شوێنێكدا بووەستێندرێت، واتا بەردەوام پێویستی بەخۆنوێكردنەوەو هەڵسەنگاندن و چاكسازی هەیە، روانگەی فۆكۆیاما-٢٠٢٣ پشتگیری ئەم بنەماو پێوەرانە دەكات و حكومڕانی باش دابەشی سەر سێ رەهەندی سەرەكی دەكات: كارایی، شەفافیەت و بەرپرسیارێتی.

ئایا حكومڕانێتی ئەمڕۆی هەرێم لەكوێی ئەم پێوەرو بنەماو تیۆرییە زانستی و سیاسی و شێوازەی بەڕێوەبردن یا چ ئاستێكی كارایی و شەفافییەت و بەرپرسیارێتیەیە؟ هەركەس دەزانێت لەهیچ كوێی، كەواتا پێداگرییەكەی یەكێتی بنەمایەكی زانستی و سیاسیی و ئیداری و بابەتی هەیە.

دۆخی حكومڕانێتی هەرێم:
سەرەڕای ناڵەو هاواری خەڵك، جگە لەنیگەرانی و ناڕەزایی ئازادیخوازان، دوور لەبگۆو بانگەشەی حزبۆكراتە موزەییەف و كاردانەوەی كارەكتەرە بێپڕۆژەو بێشوێنەكان، تەنها بەپێوەری لێكۆڵینەوەو هەڵسەنگاندنە زانستییە ناوخۆیی و هەرێمی و بیانییەكان، لاڕێ بوونی سیستمی دادوەری و یاسایی، سیستمی دارایی و ئابووری، كەرتی گشتی و خزمەتگوزارییەكان، پەیوەندیە نێودەوڵەتییەكان، ئەداو ئیدارەو دامەزراوە هەستیارەكان بەتایبەتی بوون بەڕاستییەكی نكۆڵیهەڵنەگرو حەتمی.
ئەمە بەرهەمی تاكڕەوی و لاڕێكارییە، نەك دیاردەو لێكەوتەی زەمینی و ئاسمانی، خەڵكی كوردستان حكومەتێك دەخوازن هاوسەنگ و دادپەروەرو دەرفەتی یەكسان بداتە هەمووان و لەژێر سایەیدا شكۆمەندو ئازادبژین، ئیدارەیەكیان دەوێ بەدیهێنەری خەونە لەمێژینەكانی گەلەكەمان، هەربۆیە لەدیدی یەكێتییدا هەر هەنگاوێك بەرەو ڕاستكردنەوەی رێڕەوەكە هەنگاوێكە بەرەو بەدیهێنانی ئەم خەونە مەزنەی شەهیدان و میللەتەكەمان. 

ستراتیژی راستكردنەوە:
هەنگاوەكانی راستكردنەوەی رێڕەوەكە: چاكسازی سیستمی دارایی، بەرەنگاری رۆتین و گەندەڵی، نەهێشتنی جیاكاری لەپێدانی خەدەمات و هاوسەنگی لەپێشكەشكردنی خزمەتگوزاری، بەهێزكردنی دامەزراوە دیموكراتییەكان، پەرەپێدانی كەرتی تایبەت و فەرامۆشی تەمای نانەوتی، رێكخستنەوەو باشكردنی پەیوەندییەكان لەگەڵ ناوەندو وڵاتانی دراوسێ لەحكومەتێكی تەواو نیشتمانییدا كە خەڵك تیایدا سەرچاوەی بڕیار بێت.

كاریگەرییە چاوەڕوانكراوەكان:
ڕاستكردنەوەی ڕێڕەوەكەو بەدیهاتنی حكومەتی نیشتمانی، جگە لەئاساییبوونەوەی ژیان و گوزەرانی خەڵك و دۆخەكە، دەتوانێ گەشەی ئابووری بەرز بكاتەوەو متمانەی هاوڵاتی بەدامەزراوە جیاكان نەك هەر ببوژێنێتەوە بەڵكوو بەرەو سەر بەرێ، دەكارێ رێژەی راكێشانی وەبەرهێنانی بیانی لەرووی چەند و چۆنایەتی زیاد بكات، تەنانەت ببێتە سەرەتایەكی گرنگ بۆ دەستپێكردنی كۆچی پێچەوانە.

ئەنجام:
راستكردنەوەی رێڕەوی حكومڕانی تەنها دروشمێك نییە، پێداویستییەكی حەتمی و گوزارشتەكردنە لەئازارەكانی ئەمڕۆی خەڵك و هیوای نەوەكانی داهاتووشە بۆ ژیانێكی ئارام و خۆشگوزەران، یەكێتی ئامادەی روبەڕوبوونەوەی ئاڵنگارییەكانەو پێداگرییەكەیشی نە هەر كارێكی سیاسی، بەڵكوو ئەركێكی نیشتمانی و ئەخلاقیشە.