هەڵەبجە برینێکە سارێژ نابێت

 ١٦ی ئازاری هەشتاوهەشت، ئاسمان بەدەم ئازارەکانیەوە هاواری دەکرد و زەوی لە ناڕەحەتیدا دەلەرزی، لە هەڵەبجە قێزەونترین کارەساتی دژە مرۆڤایەتی بە خوێنی گەش وئاڵی خەڵکە بێتاوانەکانی نوسرایەوە ئەوخەڵکەی کە جگە لە ژیانکردن لە شوێنێک کە هەمیشە بە سۆز و بەزەییەوە لە باوەشی گرتبوون، هیچ گوناهێکی تریان نەبوو. ئەو ئاسمانەی کە هەڵگری بای سارد و جوان بوو، ئەو ڕۆژە بۆنی سێو بۆنی مردنی هەڵگرتبوو، بێتاوانی لەگەڵ ئازار و هیوای لەگەڵ کارەسات تێکەڵ دەکردبوو. 

   هەڵەبجە، ئەو شارەی بە ڕەنگی ژیان و دەنگی مناڵانی گەشەی دەکرد، شاهیدی یەکێک لە ترسناکترین تاوانەکانی دژ بە مرۆڤایەتی بوو، وەک چۆن هەورێکی گازی ژەهراوی هاتە ناو ئاسمانی هەڵەبجە و چاوانی کوێر کرد و هەناسەی کوژاندەوە، بێ ڕەحمانەش مەرگی تۆو کرد.

یادی هەڵەبجە لە ویژدانماندا زیندوو دەمێنێتەوە، ئەو خوێنە پاکەمان بیردەخاتەوە کە بەسەر خاکەکەیدا ڕژاوە، هانماندەدا بۆ ئەوەی لەبەرامبەر ئەو تاوانانەدا وریا بین کە زەمەن ناتوانێت بیسڕێتەوە. 

هەڵەبجە برینێکە ساڕێژ نابێت، و ئازارێکە هەرگیز ناڕوات، چونکە تاوانێک بوو دژی مرۆڤایەتی، دژی بێتاوانی، دژی خودی ژیان.

یادەوەری هەڵەبجە تەنها یادەوەری شەڕ یان بۆردومانی وەحشیانەی شارێک نییە، بەڵکو وانەیەکە بۆ ئێمە، بۆ مرۆڤایەتی، لە یادەوەرییەکدا بە تێپەڕبوونی کات نامرێت. 

 هاوارێکە لە بەرامبەر نادادپەروەریدا، وێنەی هەموو ئەو کەسانەیە پێیان وایە بە توندوتیژی قەیرانەکان چارەسەر دەکرێت، یا ئەوانەی پێیان وایە دەکرێت نەتەوەیەک گەلێک لەسەر زەوی بسڕنەوە.

 هەڵەبجە، ئەمڕۆ و هەموو ڕۆژێک، برینێکی لەبیرنەکراوە، دەنگە خەمناکەکەی هێشتا لە نێوماندا دەنگ دەداتەوە: "لەبیرمان ناچێت

ەوە."