جەژنی نەتەوە

هەموو نەتەوەكان و میللەتەكانی سەر هەسارەی زەوی، رۆژێكیان هەیە بۆ شانازی و گێڕانەوەی بەسەرهاتی باپیران بۆ نەوەكانی ئەمڕۆو نەوەكانی داهاتوویان، ئەم رۆژە نەتەوەییە لە فەرهەنگی میللەتاندا پێی دەوترێت(جەژنی نەتەوە).
سەرجەم میللەتەكانی جیهان رێز لە جەژنی نەتەوەیی یەكتر دەگرن، بۆ نموونە لەسەردەمی خیلافەتی عەباسیدا یادی جەژنی نەورۆز كراوەتەوەو رێز لەو نەتەوانە گیراوە لە چوارچێوەی ئەم خیلافەتەدا خاوەنی ئەم جەژنە بوون، بۆ نموونە كورد و فارس و ئەفغان و هتد... رێگەیان پێدراوە جەژن و مەراسیمی خۆیان بە ئازادانە بكەنەوە..
هەروەها لەسەردەمی دەوڵەتی فاتمیەكاندا بەهەمان شێوە جەژنی نەورۆز وەك جەژنی نەتەوەیی كوردو میللەتانی ئاری ئاماژەی بۆ كراوەو لە فرمان و بڕیارە دیوانیەكاندا وەك جەژنێكی رەسمی ناودەوڵەتی خیلافەت ئاماژەی پێكراوە..
لەسەردەمی ئەمڕۆشماندا دەوڵەتانی ئەوروپاو ئەمریكاو ئاسیا، تێڕوانینیان بۆ جەژنی نەتەوەیی كورد و میللەتانی تری ئاری كە پێمان دەڵێن هیندۆ ئەوروپی رێزلێگیراو و بەرزە، هەموو ساڵێك بەڕێزەوە پیرۆزبایی و ئاماژەی جوان دەنێرن بۆ پیرۆزكردنی ئەم جەژنەو جەژنەكانی تری میللەتانی رۆژهەڵات..
ئەم خاڵانە ئاماژەن بۆ ئەوەی كە سەرجەم میللەتانی جیهان رێز لە بۆنەو یادو جەژنەكانی یەكتر دەگرن، ئەم رێزگرتنەش دەچێتە خانەی مێژووی هاوبەشی خەڵكانی سەر هەسارەی زەوی و ویستن و خۆشویستن بۆ یەكتر، بۆیە ناكۆكیەكان چەندە بەسوێ بن و ركابەریەكان خەستتر ببەنەوە بەڵام هێشتا خاڵە هاوبەشەكان لەنێوان مرۆڤەكاندا ماون و دەمێنن..

*سكرتێری لقی سلێمانی سەندیكای رۆژنامەنووسانی كوردستان