شێخ جەعفەر شێخ مستەفا به‌بۆنه‌ی ساڵیادی دامه‌زراندنی یه‌كێتییه‌وه‌ په‌یامێكی بڵاوكرده‌وه‌

پەیامی جێگری سەرۆک لە ساڵیادی دامەزراندنی یەکێتیی نیشتیمانیی کوردستاندا

لە یادی (٤٨) هەمین ساڵڕۆژی دامەزراندنی یەکەم گڵپەی شۆرشی نوێی گەلەکەمان، کە یەکێتیی نیشتیمانیی کوردستانە، پیرۆزباییەکی گەرم ئاراستەی سەرۆکی یەکێتیی نیشتیمانیی کوردستان، سەرۆک و ئەندامانی ئەنجومەنی باڵای سیاسیی و بەرژەوەندییەکانی یەکێتی، ئەندامانی ئەنجومەنی سەرکردایەتی، کەسوکاری سەربەرزی شەهیدان، پێشمەرگە دێرین و زیندانییە سیاسیەکان، پێشمەرگەکانی سەنگەری بەرگری و پارێزگاری لە نیشتیمان، خەباتگێڕان و جەماوەرە دڵسۆزەکەی یەکێتیی نیشتیمانیی کوردستان دەکەم.
یەکێتی حزبی شەهیدان، خاوەن مێژوویەکی پڕ سەروەرییە لە خەبات و تێکۆشانی ڕێگای ڕزگاریخوازی گەلی کوردستان، هەمیشە بیروڕا و خوێندنەوەی تایبەت بەخۆی هەبووە بۆ گشت قۆناغە جیاجیاکان و کێشە کەڵەکەبووەکانی نێو کایەی سیاسی، گوزەران و زەحمەتییەکانی کۆمەڵانی خەڵکی کوردستانی لە ئاست بژێوی ژیان و دەستەبەری مافەکانیان بە ئەرک و خەمی خۆی زانیوە، ئەمەش گەواهیدەری ئەو ڕاستییانەیە کە یەکێتی لە دیدگای بەرپرسیارێتی و لەسەر بنەمای دیموکراسییەت و ماف و ئازادی و دادپەروەری کۆمەڵایەتی و داکۆکیکردن لە چینی کرێکاران و ڕەنجدەران درێژەی بە خەبات داوە.
هیواخوازم لەم یادەدا، یەکێتی وەک هێزێکی پێشکەوتنخواز و خاوەن ئەزموون لە پڕۆسەی حوکمڕانیدا لە ڕوانگە دیموکراسیی و پێشنیاز و تێزە پڕ واقیعیەکانی وەرچەخانێک بێنێتە ئاراوە بۆ چارەسەرکردن و چەسپاندنی پرسە یاسایی و دەستورییەکان، هەروەها کار بکات بۆ تێپەڕاندنی ئەو ئاڵنگاریی و بەربەستانەی کە لە بەردەم پڕۆسەی سیاسیی عێراق و کوردستاندا بوونی هەیە.
 بۆ ئەمڕۆ و داهاتوومان گرنگە هەنگاوی جددی بنێین بۆ چارەسەرکردنی کێشەکانی بەردەم پڕۆسەی سیاسیی، یەکڕیزی و یەکگرتوویی نێوان پارتە سیاسییەکان بکەین بە هەوێنی ئاشتی و ئارامیی و سەقامگیری بۆ ناوچەکەمان، هەروەها کار بکرێت بۆ بە ئەنجام گەیاندنی پڕۆسەی چاکسازی لە گشت بوارەکان، لەپێناو هێنانەدی و دەستەبەرکردنی ماف و ئازادی و خۆشگوزەرانی بۆ هاووڵاتیانی کوردستان.
لەکۆتاییدا سەری ڕێز و نەوازش بۆ گیانی پاکی دامەزرێنەر و سەرکردەی مێژوویی و خەباتگێڕی گەلەکەمان هەڤاڵ مام جەلال و سەرجەم شەهیدانی یەکێتی نیشتیمانی کوردستان و شەهیدانی ڕێگای ڕزگاریخوازی گەلی کوردستان دادەنەوێم و دروود لە ڕۆحی پاکیان بێت.
شێخ جەعفەر شێخ مستەفا
جێگری سەرۆکی هەرێمی کوردستان
٢٠٢٣/٦/١