سودانی بەسەردانی رەسمی دەچێتە ئەمریكا

سه‌رۆك وه‌زیرانی عیراق به‌سه‌ردانێكی ره‌سمی به‌غدای به‌ره‌و ئه‌مریكا به‌جێهێشت، بڕیاره‌ سبه‌ینێ رێكخراوی نه‌ته‌وه‌یه‌كگرتوه‌كان به‌به‌شداری 140 وڵاتی جیهان كۆببێته‌وه‌

محه‌مه‌د شیاع سودانی، سه‌رۆك وه‌زیرانی عیراق، به‌سه‌ردانێكی ره‌سمی و بۆ  به‌شداریكردن له‌ كۆبونه‌وه‌كانی 75ه‌مین دانیشتنی كۆمه‌ڵه‌ی گشتی نه‌ته‌وه‌ یه‌كگرتوه‌كان،  به‌غدای پایته‌ختی به‌ره‌و ویلایه‌تی نیوۆركی ئه‌مریكا به‌جێهێشت.

بڕیاره‌ سبه‌ینێ رێكخراوی نه‌ته‌وه‌یه‌كگرتوه‌كان به‌به‌شداری 140 وڵاتی جیهان كۆببێته‌وه‌ و گفتوگۆكردن ده‌بێـت له‌باره‌ی خراپی گوزه‌رانی هاوڵاتیان به‌گشتی له‌ وڵاتانی جیهان و زۆربونی شه‌ڕ و تێكچونی كوتپڕی كه‌شوهه‌وا.

ئه‌نتۆنیۆ گۆتێرێس سكرتێری گشتیی نه‌ته‌وه‌ یه‌كگرتوه‌كان رایگه‌یاند، "كۆبونه‌وه‌كه‌مان له‌ كاتێكدایه‌ كه‌ مرۆڤایه‌تی له‌به‌رده‌م ئاڵنگاریی زۆردایه‌، هه‌ر له‌ زیادبونی حاڵه‌تی كتوپڕی كه‌شوهه‌وا تا ده‌گاته‌ به‌رزبونه‌وه‌ی ئاستی شه‌ڕ و جه‌نگه‌كان، گرانیی گوزه‌ران و نه‌بونی یه‌كسانی و په‌ره‌سه‌ندنی ته‌كنه‌لۆجیا، بۆیه‌ خه‌ڵك چاوه‌ڕێی سه‌ركرده‌كانیان ده‌كه‌ن تا له‌م میحنه‌تانه‌ رزگاریان بكه‌ن، به‌ڵام به‌داخه‌وه‌ جیهانێكی دابه‌شبو له‌ تواناكانی چۆنیه‌تی مامه‌ڵه‌كردن له‌گه‌ڵ ئه‌م قه‌یرانانه‌دا كه‌مده‌كاته‌وه‌".