کونسوڵخانەی ئەمریکا له‌ هه‌ولێر: نیگەرانیەکانمان له‌ پاشەکشەی ئازادیی راگەیاندن له‌ هه‌رێم به‌رده‌وامه‌

كونسوڵخانه‌ی ئه‌مریكا له‌ هه‌ولێر دووپاتیده‌كاته‌وه‌ كه‌ لە نیگەرانیەکانیان دەربارەی پاشەکشەی ئەم دواییانەی ئازادیی راگەیاندن له‌ هه‌رێمی كوردستان به‌رده‌وامن.
 
كونسوڵخانه‌ی ئه‌مریكا له‌ هه‌ولێر له‌ راگه‌یه‌ندراوێكدا ئاماژه‌ی‌ بۆئه‌وه‌كردووه‌: "مارك سترۆ- كونسوڵی گشتیی كونسوڵخانه‌ی ئه‌مریكا له‌ هه‌ولێر، له‌گه‌ڵ رۆژنامه‌وانانی ژماره‌یه‌ك ناوه‌ندی راگه‌یاندنی سه‌ربه‌خۆ له‌ هه‌رێم كۆبووه‌ته‌وه‌ بۆ ئاشنابوون بە کارەکانیان و پانتایی کاری ڕاگەیاندن و ئەو ئاڵنگاریانەی ڕوبەڕوی ڕاگەیاندنی سەربەخۆ دەبنەوە".
 
باسی له‌وه‌شكردووه‌: "كونسوڵی گشتیی ده‌ستخۆشی له‌ رۆژنامه‌وانه‌كان كردووه‌ له‌به‌رامبه‌ر هه‌وڵه‌ به‌رده‌وامه‌كانیان بۆ روماڵكردنی بێلایه‌نانه‌ی هه‌واڵه‌ سیاسی و ئابووری و كۆمه‌ڵایه‌تییه‌كانی هه‌رێم".
 
دووپاتشیكردووه‌ته‌وه‌: "به‌رده‌وامن له‌ نیگه‌رانییه‌كانیان ده‌رباره‌ی پاشه‌كشه‌ی ئه‌م دواییانه‌ی ئازادیی ڕاگه‌یاندن، پاشه‌كشه‌ له‌ نموونه‌ی ده‌ستبه‌سه‌ركردنی هه‌ڕه‌مه‌كیانه‌ و پشكنینی نایاسایی ئامێری ئه‌لیكترۆنی و كه‌موكوڕیی له‌ جێبه‌جێكردنی یاسای كاری ڕاگه‌یاندن و یاسای مافی به‌ده‌ستهێنانی زانیاریی هه‌رێمی كوردستان".