بافڵ جه‌لال تاڵه‌بانی، سه‌رۆكی یه‌كێتیی نیشتمانیی كوردستان له‌درێژه‌ی دیداره‌كانیدا له په‌راوێزی سێهه‌مین رۆژی به‌ڕێوه‌چوونی كۆنفرانسی ئاسایشی میونشن، له‌گه‌ڵ عه‌بدوڵا عه‌لی ئه‌لیه‌حیا، وه‌زیری ده‌ره‌وه‌ی كوه‌یت كۆبووه‌وه.
له كۆبوونه‌وه‌كه‌دا پێویستیی په‌ره‌پێدانی په‌یوه‌ندییه‌كان و هاریكاریی زیاتری نێوان هه‌رێمی كوردستان و كوه‌یت، پاراستنی سه‌قامگیریی ناوچه‌كه جه‌ختیلێكرایه‌وه.
له‌درێژه‌ی كۆبوونه‌وه‌كه‌دا نوێترین گۆڕانكارییه‌كانی رۆژهه‌ڵاتی ناوه‌ڕاست گفتوگۆیان له‌باره‌وه‌كرا و سه‌رۆك بافڵ جه‌لال تاڵه‌بانی جه‌ختی له چاره‌سه‌ركردنی ئاشتییانه‌ی كێشه‌كان كرده‌وه و رایگه‌یاند، پێویسته سه‌روه‌ریی وڵاتان پارێزراوبێت و هه‌نگاوه‌كان له‌چوارچێوه‌ی بنه‌ما نێوده‌وڵه‌تییه‌كان بێت. وتیشی، ئه‌ركی هه‌موولایه‌نه‌كانه به به‌رپرسیارێتییه‌وه مامه‌ڵه بكه‌ن و رێگریی له فراوانبوونی گرژییه‌كان بكرێت.
له‌به‌رامبه‌ردا عه‌بدوڵا عه‌لی ئه‌لیه‌حیا، وه‌زیری ده‌ره‌وه‌ی كوێت وێڕای به‌رزنرخاندنی رۆڵی سه‌رۆك مام جه‌لال له پاراستنی ئاسایشی عیراق، ئاماژه‌ی به‌وه‌شكرد، په‌یوه‌ندییه‌كانی نێوان هه‌رێمی كوردستان , عیراق و كوه‌یت له‌سه‌رده‌ستی سه‌رۆك مام جه‌لال گه‌شه‌ی پێدرا، ئێمه به پێزانینه‌وه له‌و رۆڵه مێژووییه ده‌ڕوانین، ئێستاش خۆشحاڵین له‌سه‌ر ده‌ستی بافڵ جه‌لال تاڵه‌بانی درێژه به‌و سیاسه‌ته حه‌كیمانه‌یه ده‌درێت و ئێمه‌ش پاڵپشت و هاوكارتان ده‌بین.
Copyright © 2020 Kirkuk Tv All Rights Reserved Designed And Developed By AVESTA GROUP