ئەمڕۆ یەکەم کاروانی حاجییان دەگەڕێنەوە عێراق

وەزارەتی گواستنەوەی عێراق، رایگەیاند، لەمڕۆوە یەکەم کاروانی حاجییان بەرەو عێراق دەستیان بەگەڕانەوە کرد.
بەگوێرەی راگەیەندراوێک کەشەوی رابردوو وەزارەتی گواستنەوەی عێراق بڵاویکردووەتەوە، لەمڕۆوە یەکەم کاروانی حاجییان لەرێگەی فڕۆکەخانەی جەددەوە دەگەڕێنەوە بۆ فڕۆکەخانەکانی عێرا بۆ هەر رۆژێکیش دوو گەشت ئەنجامدەدرێت.
وەزارەتی گواستنەوەی عێراق ئاماژەی بەوەشکردووە، پڕۆسەی گەڕانەوەی حاجییان لەئەمڕۆوە تاوەکو 3ی تەمووز بەردەوامدەبێت.
ئەوەشی خستۆتەڕوو، کارگێڕی فڕۆکەخانەکان پلانی پێشوەختەیان ئامادەیە، بەمەبەستی سەلامەتی و کوالێتی خزمەتگوزارییەکانیان لەبەرامبەر پێشوازیکردن لەحاجییانی ماڵی خودا.
پشکی عێراق لەوەرزی حەجی ئەمساڵ، 33 هەزار و 690 حاجی بووە، لەو ژمارەیەش پشکی هەرێمی کوردستان بە 13.9%ی کۆی پشکی عێراق دیاریکراوە، ئەم پشکە رێبەران و بەڵێندەرو کارگێڕان لەخۆدەگرێت.