سەرۆکایەتیی کۆماری عیراق فەرمانی بۆ دەستبەکاربوونی سەرۆکی نوێی دادگای فیدراڵی دەرکرد

دوێنێ، ئەنجوومەنی باڵای دادوەریی عیراق، داواکاریی خانەنشینبوونی جاسم محەمەد عەبود، سەرۆکی پێشووی دادگای باڵای فیدراڵی پەسەندکرد و مونزر ئیبراهیمی بۆ پۆستی سەرۆکی دادگاکە کاندید کرد.
ئەمڕۆش سەرۆکایەتیی کۆماری عیراق ڕایگەیاند: سەرۆک کۆمار مەرسومی کۆماری بۆ دەستبەکاربوونی مونزر ئیبراهیم حەسەن وەک سەرۆکی نوێی دادگای باڵای فیدراڵی دەرچووە، ئەوەی ماوەتەوە سوێندی یاساییەکەی دەبێت و وەکو سەرۆکی نوێی دادگای باڵای فیدراڵی دەستبەکار دەبێت.
سەرچاوەیەکی باڵای نێو دادگای فیدراڵی ئاشکرایکردووە، هەر نۆ دادوەرەکەی دادگای فیدراڵی کە پێشتر نامەی دەستلەکارکێشانەوەیان پێشکەشکردبوو، دەگەڕێنەوە دادگا و ئەرکەکانی خۆیان جێبەجێ دەکەن.
ئاماژەی بەوەشکرد: هەر نۆ دادوەرەکە ئامادەییان نیشانداوە بگەڕینەوە سەر ئەرکەکانی خۆیان.