بازرگانیى عێراق: زیاتر لە شەش ملیۆن تۆن گەنم لە جوتیاران وەرگیراوە

وەزارەتى بازرگانى عێراق رایگەیاند، لەوەرزى بەبازاڕکردنى دانەوێڵەى ئەمساڵ، شەش ملیۆن تۆن گەنم لەجووتیاران کڕدراوەتەوە.

محەمەد حەنون وتەبێژى وەزارەتى بازرگانیى عێراق رایگەیاند، پرۆسەى بەبازاڕکردنى گەنمى ئەمساڵى جووتیارانى هەرێمى کوردستان بەردەوامەو دواى ئەو سەرکەوتنەى لەپارێزگاکانى ناوەڕاست و باشوور بەدەستیانهێناوە، بڕى گەنمى وەرگیراو لەجووتیاران شەش ملیۆن تۆنى تێپەڕاندووە.

لەوەرزى بەبازاڕکردنى ئەمساڵیش، جووتیاران شایشتە داراییەکانیان لەگەڵ رادەستکردنى گەنمەکەیان وەرگرتووەو بەگرتنەبەرى ژمارەیەک رێکار تەواوى گەنمى جووتیاران وەرگیراوەو رێگەنەدراوە گەنمى ساڵانى رابردوو ببرێتە کۆگاکان.

باسی لەوەشکردووە،  ئەمساڵ ساڵى خۆبژێوییە لەبەرهەمى گەنم، دواى تێپەڕاندنى بەربەستى شەش ملیۆن تۆن، دەکرێت لەرۆژانى داهاتووشدا بەبڕى گەورەتر ژمارەیەک زۆر زیاتر تێپەڕێنرێت، بەتایبەت لەگەڵ بەردەوامى وەرزى بەبازاڕکردن لەهەرێمى کوردستان.